Bıçaqla silahlanmış şəxslər Delle Allinin evinə basqın ediblər
Bakı, 14 may, AZƏRTAC
Futbol üzrə İngiltərə millisinin və “Tottenhem” klubunun yarımmüdafiəçisi Delle Allinin Londondakı evinə girən iki soyğunçu ona yüngül xəsarət yetiriblər.
AZƏRTAC xarici KİV-lərə istinadla xəbər verir ki, bıçaqlı soyğunçuların hücumu zamanı futbolçunun yanında qardaşı və dostları olublar. Onu təhdid edən şəxslərlə əlbəyaxa olan futbolçu üz nahiyəsindən yumruq zərbələri alıb.
Soyğunçular evi tərk edərkən qızıl-zinət əşyaları, o cümlədən qol saatları apara biliblər. Həmin şəxslər təhlükəsizlik kameraları tərəfindən qeydə alınıb.
Hadisə ilə bağlı təhqiqat aparılır.
Ona dəstək nümayiş etdirən azarkeşlərə “Twitter”dəki səhifəsində minnətdarlığını çatdıran futbolçu vəziyyətinin normal olduğunu bildirib.
Bölmənin digər xəbərləri
