“Bir ağac-min nəfəs” devizi ilə tingpaylama aksiyası davam edir
Bakı, 23 mart, AZƏRTAC
Ekologiya və Təbii Sərvətlər Nazirliyi və "Bazarstore" marketlər şəbəkəsinin birgə təşkilatçılığı ilə bu gün Lənkəran şəhəri ərazisində fəaliyyət göstərən “Bazarstore” supermarketinin qarşısında tinglərin paylanması aksiyası keçirilib.
Bunu AZƏRTAC-a açıqlamasında Ekologiya və Təbii Sərvətlər Nazirliyinin Ekoloji Maarifləndirmə və İctimaiyyətlə Əlaqələr şöbəsinin müdiri Səyyarə Məmmədova bildirib.
Nazirliyin şöbə müdirinin sözlərinə görə, ağac əkilməsinin təşviqi məqsədilə keçirilən tədbirdə ekokönüllülər tərəfindən vətəndaşlara sərv, heyva, feyxoa, alma, yapon əzgili, oleandr, birgöz, şaftalı tingləri hədiyyə edilib, onların əkilməsinə dair məlumatlar verilib.
S.Məmmədova qeyd edib ki, paylanılan ağac tingləri nazirliyin tinglik sahələrində yetişdirilir və paylanarkən hər regionun iqlim şəraiti nəzərə alınır. Aksiyalar Bakıda və bölgələrdə növbəti günlərdə də davam etdiriləcək.
“Vətəndaşları fəal iştirak etməyə, təbiətə fayda verəcək həmin aksiyadan yararlanmağa çağırırıq. Eyni zamanda, əldə etdikləri tinglərin əkin şəkillərini sosial şəbəkələr vasitəsilə bizimlə bölüşməyə səsləyirik”, - deyə nazirliyin şöbə müdiri vurğulayıb.
Bölmənin digər xəbərləri
