Tbilisi, 19 sentyabr, AZƏRTAC

Birinci Qarabağ müharibəsi şəhidi Elşad Budaqovun (1973-1992) xatirəsi anadan olduğu Gürcüstanın Bolnisi rayonunun Kəpənəkçi kəndində anılıb.

AZƏRTAC xəbər verir ki, Azərbaycanın Gürcüstandakı səfiri, səfirliyin əməkdaşları, rayon ziyalıları, ağsaqqallar, şəhidin yaxınları E.Budaqovun kənd qəbiristanlığındakı məzarını ziyarət ediblər.

Kənd ağsaqqalı Ramiz Bəkirov çıxış edərək Azərbaycan dövlətinin Vətəndən kənarda olan şəhidlərin yaxınlarına göstərilən diqqət və qayğını yüksək qiymətləndirib, bu ehtirama görə Kəpənəkçi ictimaiyyəti adından minnətdarlıq edib.

Bildirilib ki, Bakıda təhsilini yarımçıq qoyaraq cəbhəyə könüllü yollanan E.Budaqov döyüşlərdə qəhrəmancasına şəhid olub.

Çıxışçı Azərbaycan səfirliyi tərəfindən əslən Gürcüstandan olan şəhidlərin ailə üzvləri və yaxınlarının qayğı ilə əhatə olunmasını təqdirəlayiq adlandırıb.

Səfir Faiq Quliyev öz növbəsində şəhidin valideynləri - Məcid Budaqova və Firuzə Budaqovaya, kənd sakinlərinə başsağlığı verib.

“Gürcüstanəsilli şəhidlərin əziz xatirələrini ananda kədər hissi ilə yanaşı qürur hissi də keçiririk”, - deyə səfir bildirib.

Onun sözlərinə görə, Azərbaycan Respublikasının Prezidenti, Müzəffər Ali Baş Komandan İlham Əliyevin başçılığı altında 2020-ci ildə rəşadətli Ordumuzun apardığı və şanlı Zəfərlə yekunlaşan 44 günlük Vətən müharibəsində, eləcə də 2023-cü il sentyabrın 19-20-də Qarabağda keçirilmiş antiterror əməliyyatları nəticəsində Elşad Budaqov da daxil olmaqla bütün şəhidlərin qisası alınıb, onların qanı yerdə qalmayıb. Səfir şəhidlik zirvəsinə ucalan Vətən övladlarının əziz xatirəsinin hər zaman qəlblərdə yaşayacağını deyib.

F.Quliyev səfirliyin dövlətimizin başçısı İlham Əliyevin tapşırıqlarını rəhbər tutaraq, əslən Gürcüstandan olan şəhidlərin yaxınlarının daim diqqət mərkəzində saxlanıldığını bildirib, şəhidlərin xatirələrinin əbədiləşdirilməsi istiqamətində Gürcüstanda həyata keçirilən layihələr barədə danışıb.

Xətayi Əzizov

AZƏRTAC-ın xüsusi müxbiri

Tbilisi