BİRLƏŞMİŞ ƏRƏB ƏMİRLİKLƏRİNDƏ 28 MAY – RESPUBLİKA GÜNÜ MÜNASİBƏTİLƏ TƏDBİR KEÇİRİLMİŞDİR

01.06.2006 [23:34]
Çap et
A⁺ A^-

Azərbaycanın Birləşmiş Ərəb Əmirliklərindəki (BƏƏ) səfirliyi 28 May – Respublika günü münasibətilə paytaxt Abu Dabi şəhərindəki “Hilton” mehmanxanasında rəsmi qəbul təşkil etmişdir.

Xarici İşlər Nazirliyinin mətbuat mərkəzindən AZƏRTAC-a bildirmişlər ki, tədbirdə BƏƏ prezidentinin dini işlər üzrə müşaviri Seyid Əli Əl Haşimi, hökumət nümayəndələri, diplomatik korpusun təmsilçiləri, iş adamları və həmvətənlərimiz iştirak etmişlər.

BƏƏ-nin ətraf mühit və su naziri Məhəmməd Səid Əl Kindi Prezident şeyx Xəlifə Bin Zayid al Nəhyanın adından 28 May – Respublika günü münasibətilə başda Prezident İlham Əliyev olmaqla, Azərbaycan xalqını təbrik etmişdir. O, Azərbaycanın ölkəsi üçün mühüm əhəmiyyət kəsb edən dost və qardaş dövlət olduğunu vurğulamışdır.

Tədbirdə müstəqil Azərbaycan Respublikasının 15 ildə keçdiyi inkişaf yolundan söz açılmış, əldə olunmuş nailiyyətlər, habelə Ermənistanın Azərbaycana təcavüzü barədə ətraflı məlumat verilmişdir.

Qəbulda Azərbaycan haqqında film nümayiş olunmuş, milli musiqimizdən parçalar səsləndirilmişdir.

Respublika günü münasibətilə “Əl İttihad” qəzetinin 23 may nömrəsində Azərbaycana dair məqalə çap olunmuşdur.