Bakı, 24 noyabr, AZƏRTAC

“Heydər Əliyev İli” çərçivəsində Qırğız Respublikasında keçirilməsi planlaşdırılan tədbirlər planına uyğun olaraq, Bişkek şəhərində “Dilimiz milli sərvətimizdir” mövzusunda elmi-praktik konfrans təşkil olunub.

Azərbaycan Respublikası Diasporla İş üzrə Dövlət Komitəsinin dəstəyi, “İrs” İctimai Birliyinin və Qırğız Respublikasının Prezidenti yanında Dövlət Dili və Dil Siyasəti üzrə Milli Komissiyasının birgə təşkilatçılığı ilə baş tutan konfransda Qırğız Respublikası Prezident Administrasiyasının, ölkə parlamentinin (Joqorku Keneş), Elm və Təhsil Nazirliyinin, Mədəniyyət, İnformasiya, İdman və Gənclər Siyasəti Nazirliyinin, Qırğızıstan Xalq Assambleyasının, Çingiz Aytmatov Fondunun nümayəndələri, hər iki ölkənin elm xadimləri və Azərbaycan diasporunun fəalları iştirak ediblər.

Diasporla İş üzrə Dövlət Komitəsindən AZƏRTAC-a bildiriblər ki, Qırğızıstan və Azərbaycanın Dövlət himnlərinin səsləndirilməsi ilə başlayan tədbirdə Heydər Əliyevin əziz xatirəsi bir dəqiqəlik sükutla yad edilib.

Tədbiri giriş sözü ilə Qırğız Respublikasının Prezidenti yanında Dövlət Dili və Dil Siyasəti üzrə Milli Komissiyanın sədri Kanıbek Osmonaliyev açaraq, Azərbaycana ən çətin dövrdə rəhbərlik etmiş, vətəninin inkişafı üçün hər cür münbit şərait yaratmış dünyaşöhrətli siyasətçi Heydər Əliyevin 1995-ci ildə Qırğızıstanda keçirilən “Manas” dastanının 1000 illiyi ilə bağlı tədbirlərdə iştirak etdiyini, onun “Bir-birimizə kömək edəcək, böyük Manasın qoyduğu yolla birlikdə irəliləyəcəyik” müdrik fikrinin unudulmadığını xatırladıb.

Sonra Heydər Əliyevin həyat və fəaliyyətini əks edirən videoçarx nümayiş olunub.

Konfransda çıxış edən Diasporla İş üzrə Dövlət Komitəsinin sədri Fuad Muradov xatırladıb ki, bu il Azərbaycan Prezidenti İlham Əliyevin müvafiq Sərəncamına əsasən, ölkəmizdə “Heydər Əliyev İli” elan edilib. Milli mədəniyyətimizin, dilimizin, dinimizin, milli-mənəvi dəyərlərimizin ən böyük bilicisi və müdafiəçisi olan Heydər Əliyevin hələ sovet dövründə, ötən əsrin 60-cı illərinin sonlarından başlayaraq milli dilin təbliği üzrə ardıcıl siyasət apardığı, Azərbaycan dilinə dövlət dili statusunun verilməsi və onun qanunvericilikdə təsbit edilməsinə nail olduğu bildirilib.

Digər çıxış edənlər Qırğızıstanla Azərbaycanı bir-birinə ortaq tarixi köklərin, mədəni ənənələrin və mənəvi-əxlaqi dəyərlərin bağladığını vurğulayıb, Heydər Əliyevlə bağlı xoş xatirələrini bölüşüblər. Onun Azərbaycan xalqının və Türk dünyasının maraqları naminə həyata keçirdiyi misilsiz xidmətləri yüksək qiymətləndiriblər.

Daha sonra Fuad Muradov Ulu Öndərin çox sevdiyi mahnılardan ibarət “Heydər Əliyevin sevimli musiqi inciləri” kitabını Qırğızıstan Parlamentinin sabiq spikeri, Qırğız Respublikasının Qəhrəmanı Medetkan Şerimkulova hədiyyə edib.

Konfrans yerli kütləvi informasiya vasitələri tərəfindən geniş şəkildə işıqlandırılıb.

Səfər çərçivəsində F.Muradovun Qırğız Respublikasının Prezidenti yanında Dövlət Dili və Dil Siyasəti üzrə Milli Komissiyanın sədri Kanıbek Osmonalievlə də görüşü keçirilib. Görüşdə qonağa komissiyanın fəaliyyəti barədə ətraflı məlumat verilib. Hazırda Qırğızıstanda iki dilin (qırğız və rus) rəsmi dövlət dili olduğu, bu durumun dəyişdirilməsini nəzərdə tutan yeni qanun layihəsinin hazırlanması ilə bağlı işlərin aparıldığı bildirilib.

Komissiya sədri Diasporla İş üzrə Dövlət Komitəsi ilə imzalanan Anlaşma Memorandumu əsasında Azərbaycan diasporu ilə silsilə tədbirlər keçirildiyini məmnunluqla vurğulayıb və mədəniyyət paytaxtımız Şuşa şəhərinə səfəri ilə bağlı xoş təəssüratlarını bölüşüb.

Komitə sədri səmimi görüşə və Qırğızıstandakı Azərbaycan diasporu ilə sıx əməkdaşlıq əlaqələrinə görə minnətdarlığını bildirib. O, həmçinin “Azərbaycan Respublikasında dövlət dili haqqında” Qanunun və latın qrafikalı Azərbaycan əlifbasına keçidin tarixi barədə qısa məlumat verib.

Qeyd edilib ki, dövlətimizin başçısının doğma dilimizin təbliğinə dair tapşırıqları və dəstəyi əsasında müxtəlif xarici ölkələrdə 20-dən çox Azərbaycan Evi yaradılıb və bu evlərin nəzdində Azərbaycan həftəsonu məktəbləri uğurla fəaliyyət göstərir. Növbəti il ərzində xarici ölkələrdə daha 10 Azərbaycan Evinin açılması nəzərdə tutulur.

Görüş əməkdaşlıq perspektivləri ilə bağlı fikir mübadiləsinin aparılması və qarşılıqlı xatirə hədiyyələrinin təqdim olunması ilə yekunlaşıb.