BKS kosmosda tullantılarla toqquşmamaq üçün manevr edib
Bakı, 1 may, AZƏRTAC
Beynəlxalq Kosmik Stansiya (BKS) kosmosda tullantılarla toqquşmamaq üçün manevr edib.
AZƏRTAC xarici mediaya istinadla xəbər verir ki, BKS kosmik tullantılarla toqquşma təhlükəsi səbəbindən trayektoriyasını dəyişməli olub. Bu barədə məlumatı “Roskosmos” dövlət korporasiyası özünün rəsmi “Telegram” kanalında yayıb.
Məlumatda deyilir: “Mayın 1-də Moskva vaxtı ilə saat 01:10-da “Proqres MS-30” kosmik gəmisinin mühərrikləri işə salınaraq 212,79 saniyə işlədilib və onların hərəkəti 0,3 m/s sürətə çatıb ki, bu da BKS-nin orbitini təxminən 540 metr artırmağa imkan verib”.
Kosmik dağıntıların qarşısının alınması manevri başa çatdıqdan sonra stansiyanın Yer ətrafında orbital dövrü 92,89 dəqiqə olub. Orbitin mailliyi 51,66 dərəcəyə çatıb, orbitin orta hündürlüyü isə hazırda 418,74 kilometrdir.
Bölmənin digər xəbərləri
