BMT-NİN BAŞ KATİBİ KOFİ ANNAN NOYABRIN 19-DA GÖZLƏNİLMƏDƏN PAKİSTANDAN GÜRCÜSTANA GƏLMİŞDİR
Tbilisi hava limanında ali qonağı Gürcüstanın xarici işlər naziri Gela Bejuaşvili qarşılamışdır. Gürcüstan Prezidenti Mixail Saakaşvili ilə Kofi Annanın bağlı qapılar arxasında keçirilən 15 dəqiqəlik görüşündən sonra onlar jurnalistlər üçün brifinq keçirmişlər.
M.Saakaşvili Gürcüstana səfərinə görə qonağa təşəkkürünü bildirmiş, gürcü-abxaz münaqişəsinin sülh yolu ilə tənzimlənməsi işində BMT-nin Gürcüstandakı nümayəndəliyinin fəaliyyətindən razılıq etmiş, Abxaziyadakı vəziyyətin Gürcüstan hakimiyyətini narahat etdiyini, burada insan haqlarının kobud surətdə pozulduğunu, BMT-nin Gürcüstanda münaqişələrin tənzimlənməsi üçün fəallığı artıracağına əminliyini vurğulamışdır.
Gürçüstana səfərdən məmnunluq duyduğunu bildirən Kofi Annan, BMT-nin münaqişələrin tənzimlənməsi istiqamətində fəaliyyətinin gücləndiriləcəyini bildirmiş və münaqişə tərəflərini insan haqlarının qorunmasına, qanunun aliliyinin təmin edilməsinə çağırmışdır.
Səfər həmin gün başa çatmışdır. Xatırladaq ki, BMT baş katibi Gürcüstana sonuncu dəfə 1994-cü ildə səfər etmişdi.
Bölmənin digər xəbərləri
