BMT-nin Dayanıqlı İnkişaf üzrə Yüksəksəviyyəli Forumu keçirilir
Bakı, 9 iyul, AZƏRTAC
BMT-nin İqtisadi və Sosial Şurası (ECOSOC) təşkilatın Nyu-Yorkdakı qərargahında üzv ölkələrin nümayəndələrinin iştirakı ilə Dayanıqlı İnkişaf üzrə Yüksəksəviyyəli Forum keçirir.
AZƏRTAC BMT-nin saytına istinadla xəbər verir ki, 8-17 iyul tarixlərində keçirilən tədbirin mühüm hissəsi Şuranın Yüksəksəviyyəli Seqmenti Forumunun (HLPF) iyulun 15-dən 17-dək üçgünlük nazirlər toplantısı olacaq.
Forum “2030 Gündəliyinin gücləndirilməsi və çoxsaylı böhranlar zamanı yoxsulluğun aradan qaldırılması: davamlı, dayanıqlı və innovativ həllərin effektiv çatdırılması” mövzusunda keçirilir.
2024-cü ildə HLPF Dayanıqlı İnkişaf Məqsədlərinin inteqrasiya olunmuş, bölünməz və bir-biri ilə əlaqəli təbiətinə xələl gətirmədən aşağıdakı mövzuları ətraflı nəzərdən keçirəcək; hər yerdə yoxsulluğun bütün formalarına son qoyulması; aclığın aradan qaldırılması, ərzaq təhlükəsizliyinə və yaxşılaşdırılmış qidalanmaya nail olunması və davamlı kənd təsərrüfatının təşviqi; iqlim dəyişikliyi və onun təsirləri ilə mübarizə üçün təcili tədbirlər görülməsi; davamlı inkişaf üçün dinc və inklüziv cəmiyyətlərin rolunun artırılması; hamının ədalətə çıxışının təmin edilməsi və bütün səviyyələrdə effektiv, hesabatlı və inklüziv institutlar qurulması; Davamlı İnkişaf Naminə Qlobal Tərəfdaşlığın həyata keçirilməsi vasitələrinin gücləndirilməsi və canlandırılması.
BMT bildirir ki, 36 dövlət 2024-cü il HLPF-də 2030-cu il Gündəliyinin həyata keçirilməsinə dair könüllü milli təhlillər (VNR) aparmaqda maraqlı olduqlarını bildirib. Onların arasında Azərbaycan da var.
Bölmənin digər xəbərləri
