BMU tələbəsi: İkili diplom proqramı gələcək karyeramız üçün mühüm üstünlükdür
Bakı, 21 iyul, AZƏRTAC
Bakı Mühəndislik Universiteti (BMU) ilə Koreya Respublikasının İNHA Universiteti arasında həyata keçirilən ikili diplom proqramının (BMU-İNHA İDP) “Kompüter elmləri” (Süni intellekt mühəndisliyi) ixtisası üzrə I kurs tələbəsi Ömər Əliyev yay məktəbində əldə etdiyi təcrübə və proqramın üstünlüklərindən danışıb.
Universitetdən AZƏRTAC-a bildirilib ki, hazırda Koreyadan dəvət olunmuş professor-müəllim heyətinin iştirakı ilə təşkil olunan yay məktəbində təhsil alan tələbə proqramın həm fundamental biliklərin formalaşdırılması, həm də növbəti tədris mərhələlərinə hazırlıq baxımından əhəmiyyətini vurğulayıb.
“Yay məktəbi yalnız maraqlı dərslərlə deyil, həm də gələcəkdə ixtisasımız üzrə zəruri olacaq biliklərin əldə edilməsi ilə yadda qalır. Tələbələrin öyrənməyə həvəsli yanaşması və komanda ruhu bu prosesi daha maraqlı edir”, - deyə Ömər Əliyev qeyd edib.
Onun sözlərinə görə, yay məktəbi çərçivəsində tələbələrə “Süni intellektə giriş” və “Python proqramlaşdırma” fənləri tədris olunur. Professorlar Li və Kimin keçdiyi dərslərdə iştirakçılar süni intellektin əsasları, proqramlaşdırma bacarıqları və gələcək peşə fəaliyyətlərində istifadə edəcəkləri biliklərə yiyələnirlər.
Ömər Əliyev ikili diplom imkanını proqramın əsas üstünlüklərindən danışaraq qeyd edib: “Üç il BMU-da, bir il isə İNHA Universitetində təhsil aldıqdan sonra hər iki ali təhsil müəssisəsinin diplomunu əldə etmək gələcək karyeramız üçün mühüm üstünlükdür”.
Qeyd edək ki, Ömər Əliyev kompüter elmləri (süni intellekt mühəndisliyi) ixtisasına 649 balla qəbul olub.
Bölmənin digər xəbərləri
