Bolqarıstanda 20 yanvar faciəsinin 28-ci ildönümü ilə bağlı anım mərasimi keçirilib VİDEO
Sofiya, 20 yanvar, AZƏRTAC
1990-cı ilin 20 yanvar faciəsinin 28-ci ildönümü ilə əlaqədar Azərbaycanın Bolqarıstandakı səfirliyi Sofiyada anım mərasimi təşkil edib. Tədbirdə Azərbaycan diasporunun nümayəndələri, Bolqarıstanda yaşayan soydaşlarımız, azərbaycanlı tələbələr və “Azərbaycanın Dostları” Bolqarıstan-Azərbaycan Dostluq Cəmiyyətinin nümayəndələri iştirak ediblər.
AZƏRTAC xəbər verir ki, mərasimdə Azərbaycanın Bolqarıstandakı səfiri Nərgiz Qurbanova 1990-cı il yanvarın 20-də Bakıda törədilmiş qanlı hadisələrdən danışıb. Bildirib ki, Ümumxalq Hüzn Günü kimi qeyd etdiyimiz 20 Yanvar, eyni zamanda, Azərbaycan xalqının istiqlal yolunun zirvəsinə və milli məfkurəmizin azadlıq istəyinin oyanış gününə çevrilib. Qara Yanvara aparan yolun 1988-ci ilin ziddiyyətli hadisələrindən başlandığını bildirən N.Qurbanova sovet rəhbərliyinin xeyir-duası ilə Ermənistanın Azərbaycan barədə əsassız ərazi iddialarının xalqımıza qarşı repressiya və etnik dözümsüzlüklə, o cümlədən 250 mindən çox azərbaycanlının Ermənistan ərazisindəki doğma yurdlarını tərk etməsi ilə nəticələndiyini bildirib.
Diqqətə çatdırılıb ki, Azərbaycan xalqı sovet rəhbərliyinin məkrli planlarına etiraz edərək Dağlıq Qarabağda separatçı və ekstremist hərəkətlərin qarşısının alınmasını, ədalətin bərpa olunmasını demokratik yollarla tələb edib. Xalqın dinc və haqlı tələblərinə M.Qorbaçov hökuməti amansız cavab verib, 1990-cı il yanvarın 20-nə keçən gecə Stavropol, Krasnodar və Rostovdan səfərbərliyə alınan xüsusi təlim keçmiş erməni əsilli əsgər və zabitlərin də iştirak etdiyi SSRİ Müdafiə Nazirliyinin bölmələri, DİN-in xüsusi təyinatlıları və SSRİ DTK-nın “Alfa” qrupunun üzvləri Bakıda mülki əhalini gülləbaran ediblər. Nəticədə 147 insan öldürülüb, 744 nəfər yaralanıb, 841 nəfər isə əsassız həbs olunub. Sovet silahlı qüvvələri nəinki mülki şəxslərə, yaşayış binalarına, mağazalar, tibb və digər müəssisələrə atəş açıb, hətta təcili tibbi yardım maşınlarını da hədəfə alıblar.
Əvvəlcədən düşünülüb hazırlanmış bu təcavüzkar planın Azərbaycan xalqının demokratiya və milli azadlıq uğrunda mübarizəsini boğmaq məqsədi daşıdığını deyən diplomat hadisə zamanı insan hüquqlarına dair bir çox beynəlxalq öhdəliklərin, habelə keçmiş SSRİ və Azərbaycan SSR-in konstitusiyalarının kobudcasına pozulduğunu diqqətə çatdırıb.
20 Yanvar faciəsinin bütün dünyada əks-səda doğurduğunu söyləyən səfir beynəlxalq ictimai rəyin formalaşmasında ümummilli lider Heydər Əliyevin müstəsna xidmətini vurğulayıb. N.Qurbanova qeyd edib ki, özünün və yaxınlarının həyatını təhlükə qarşısında qoyan Ulu Öndər yanvarın 21-də Azərbaycanın Moskvadakı daimi nümayəndəliyinə gedib, oraya yığışmış azərbaycanlılar qarşısında çıxış edib, mətbuat konfransı keçirərək imperiya siyasətini və M.Qorbaçovun xalqımıza qarşı məkrli fəaliyyətini tənqid edib.
Səfir, sovet imperiyasının günahsız insanların qanını axıtsa da, milli qürurumuzu qıra bilmədiyini deyərək, Qara Yanvarın Azərbaycan tarixinə həm də qəhrəmanlıq səhifəsi kimi həkk olunduğunu vurğulayıb. Faciənin Azərbaycan elmi-ədəbi mühitində də yeni səhifə açmasından danışan N.Qurbanova şəhidlərimizin əziz xatirəsinə mahnı və musiqi kompozisiyalarının bəstələnməsini, filmlərin ithaf olunmasını, əsərlər həsr olunmasını və tamaşaya qoyulmasını qeyd edib.
Daha sonra Azərbaycan müstəqilliyinin həqiqətə çevrilməsi naminə canlarını fəda etmiş soydaşlarımızın şücaətindən bəhs edən film nümayiş olunub.
Tədbirin sonunda 20 Yanvar şəhidlərinin əziz xatirəsinə ehsan süfrəsi açılıb.
İqbal Hacıyev
AZƏRTAC-ın xüsusi müxbiri
Sofiya
Bölmənin digər xəbərləri
