Bolqarıstanda yayımlanan “Bloomberg” televiziyasında Azərbaycanın iqtisadi nailiyyətlərindən danışılıb VİDEO
Sofiya, 18 yanvar, AZƏRTAC
Azərbaycanın Bolqarıstandakı səfiri Nərgiz Qurbanova ölkələrimiz arasında diplomatik əlaqələrin 25 illiyi ilə bağlı “Bloomberg TV Bulgaria” televiziya kanalına müsahibə verib. Müsahibə kanalın rəsmi internet səhifəsində “Enerji Bolqarıstan ilə Azərbaycan arasında mövcud əlaqələrin əsasını təşkil edir” sərlövhəsi ilə yerləşdirilib.
Səfir Azərbaycan ilə Bolqarıstan arasında diplomatik əlaqələrin qurulmasından keçən 25 illik dövrü ikitərəfli əməkdaşlığın inkişafı baxımından yüksək qiymətləndirib. Azərbaycan Prezidenti İlham Əliyevin Bolqarıstana səfəri zamanı 2015-ci il martın 4-də imzalanmış Azərbaycan Respublikası ilə Bolqarıstan Respublikası arasında Strateji Tərəfdaşlıq haqqında Birgə Bəyannaməyə istinad edərək ölkəmiz tərəfindən Bolqarıstanın Avropa İttifaqı və NATO-ya üzv dövlətlər arasında strateji tərəfdaş kimi qəbul edildiyini söyləyib. O, sözügedən Birgə Bəyannamənin Azərbaycan və Bolqarıstan arasında yüksək səviyyədə strateji dialoq formatını təsis etdiyini vurğulayıb. İki ölkə arasında çoxsaylı yüksək səviyyəli səfərlərin həyata keçirildiyini və 50-dən çox sənədi əks etdirən geniş hüquqi bazanın mövcud olduğunu bildirən diplomat yüksək səviyyəli siyasi əlaqələrin iqtisadi əməkdaşlıq üçün də böyük imkanlar açdığını diqqətə çatdırıb.
Səfir 2016-cı ildə Azərbaycan-Bolqarıstan ticarət dövriyyəsinin həcminin ötən ilə nisbətdə 2 dəfə artdığını qeyd edib, 2016-cı ilin sentyabrında Bakıda keçirilən Azərbaycan-Bolqarıstan Hökumətlərarası Komissiyasının 4-cü iclasını iki ölkə arasında enerji, ticarət, sənaye, kənd təsərrüfatı, İKT və digər sahələrdə dialoqun təşviqi baxımından əlamətdar hadisə kimi qiymətləndirib. Azərbaycanın İKT sahəsində əldə etdiyi nailiyyətlərdən bəhs edən N.Qurbanova peyk xidmətləri, e-hökumət sahəsində iki ölkə arasında əməkdaşlığın genişləndirilməsinin mümkünlüyünü diqqətə çatdırıb. O, Azərbaycanın təşəbbüskarı və iştirakçısı olduğu Trans-Avrasiya Super İnformasiya Magistralı layihəsində Bolqarıstanın iştirakı imkanlarına da toxunub. Diplomat, həmçinin iki ölkə arasında enerji sahəsində əməkdaşlıqdan da bəhs edib.
Yaxın zamanda Azərbaycan ilə Avropa İttifaqı arasında bərabərhüquqlu əsasda və birgə maraqlara söykənən strateji tərəfdaşlıq sazişi layihəsi üzrə danışıqların başlanacağını qeyd edən N.Qurbanova 2018-ci ilin birinci yarısında Avropa İttifaqı Şurasına sədrlik edəcək Bolqarıstanın bu məsələdə dəstəyinə ümidini ifadə edib.
Müsahibə zamanı aparıcı dünya bazarlarında neftin qiymətinin aşağı düşməsinin Azərbaycan iqtisadiyyatına təsirinə toxunaraq Azərbaycan Respublikası Dövlət Neft Fondundan (ARDNF) ölkə büdcəsinə transfertlərin həyata keçirildiyini qeyd edib və bu transfertlərin davamlı olub-olmayacağını soruşub. Səfir ARDNF tərəfindən ölkə büdcəsinə olan köçürmələrin Fondun əsas məqsədlərindən biri olduğunu və bunun qurumun əsasnaməsində də əks olunduğunu bildirib. Diplomat dünya bazarında neftin qiymətinin yüksək olduğu dövrdə ARDNF-in enerji ehtiyatlarından əldə edilmiş gəlirləri toplamağa müvəffəq olduğunu və hazırda bu vəsaitin təqribən 33 milyard ABŞ dolları təşkil etdiyini diqqətə çatdırıb. Səfir deyib ki, hazırkı dövrdə Azərbaycan iqtisadiyyatı dayanıqlılığını və mövcud iqtisadi çətinliklərə hazır olduğunu nümayiş etdirir. Ölkənin makroiqtisadi və maliyyə sabitliyinin qorunması baxımından ARDNF tərəfindən büdcəyə köçürülən transfertlər böyük rol oynayır. Buna baxmayaraq, ölkə iqtisadiyyatının enerji sektorundan asılılığının azaldılması istiqamətində hökumət tərəfindən əməli addımlar atılır və bu addımlar öz bəhrəsini verməyə başlayıb. Bu məqsədlə, struktur, institusional, maliyyə və digər islahatlar həyata keçirilir, milli iqtisadiyyat və onun aparıcı sektorlarının inkişafı üzrə Strateji Yol Xəritəsi qəbul edilib.
TANAP layihəsinin hazırkı vəziyyəti və “Türk axını” layihəsinin ona rəqib olub-olmayacağı barədə suala cavabında səfir deyib ki, “TANAP” dünyanın ən mürəkkəb qaz nəqli layihələrindən biridir və “Cənub” qaz dəhlizinin tərkib hissəsidir. Bu layihə Avropanı Xəzər hövzəsində hasil edilən alternativ qaz həcmləri ilə təmin etməklə onun enerji təhlükəsizliyinə töhfə verəcək. “Cənub” qaz dəhlizinin bütün tərkib hissələri, o cümlədən TANAP üzrə intensiv iş aparılır. TANAP vasitəsilə nəql ediləcək 16 milyard kubmetr qazın satılması və nəqli ilə bağlı bütün müqavilələrin artıq imzalandığını qeyd edən səfir bu baxımdan “Türk axını” layihəsinin TANAP-a rəqib olmadığını bildirib. Son dövrdə “Cənub” qaz dəhlizinə digər enerji istehsalçıları və alıcılarının marağının artdığının müşahidə olunduğunu bildirən səfir bu amilin gələcəkdə TANAP kəmərinin ötürücülük qabiliyyətinin 31 milyard kubmetrədək artırılmasına zəmin yaratdığını qeyd edib. Diplomat bu xüsusda Bolqarıstanın tək alıcı deyil, həm də Azərbaycan qazının digər Avropa ölkələrinə nəql edilməsi uçun vacib tranzit ölkə kimi nəzərdən keçirildiyini vurğuladı.
Qeyd edək ki, maliyyə və iqtisadi xəbərlər sahəsində qlobal lider olan “Bloomberg Television” ilə Bolqarıstanın “Bulgaria ON AIR” telekanalı arasında 2013-cü ildən etibarən mövcud olan əməkdaşlığın növbəti mərhələsi kimi 2015-ci ildə təsis edilmiş “Bloomberg TV Bulgaria” Bolqarıstanın və dünyanın iqtisadi və maliyyə xəbərlərini, biznes sektorunun müxtəlif mövzularını əhatə edən, bolqar dilində yayımlanan televiziya kanalıdır. Bu telekanalın proqramları Bolqarıstan ərazisində mövcud bütün kabel və peyk televiziya operatorları vasitəsilə, eləcə də www.bloombergtv.bg internet səhifəsində onlayn rejimdə yayımlanır.
İqbal Hacıyev
AZƏRTAC-ın xüsusi müxbiri
Sofiya
Bölmənin digər xəbərləri
