BORULARIN BETONLA ÜZLƏNMƏSİ İŞLƏRİNDƏ REKORD GÖSTƏRİCİ ƏLDƏ EDİLMİŞDİR
Azərbaycan Respublikası Dövlət Neft Şirkətindən (ARDNŞ) AZƏRTAC-a bildirmişlər ki, səhmləri şirkətə məxsus olan “Caspian Pipe Coatings” müəssisəsində rekord göstərici əldə edilmişdir.
Burada “Bahar”-Hövsan-Suraxanı qaz kəmərinin inşasında istifadə ediləcək borulardan 240-ı bir sutkada betonla üzlənmişdir.
“Bahar”-Hövsan-Suraxanı qaz kəməri 2008-ci ilin əsas buraxılış obyektlərindən biridir. “Şimal” elektrik stansiyasını və Bakının ətraf qəsəbələrini təbii qazla təmin edəcək boru kəmərinin dənizin dibi ilə çəkiləcək hissəsinin uzunluğu 37, quru hissəsinin uzunluğu isə 12 kilometrdir. 20 düymlük yüksək keyfiyyətli borular Almaniyanın “Mannesmann” şirkətinin istehsalıdır.
“Caspian Pipe Coatings” zavodunda boruların betonla üzlənməsi işlərinə iki həftə əvvəl başlanmışdır. Bu müddətdə ümumi uzunluğu 13 kilometr olan 1.173 boru üzlənmişdir.
ABŞ və Almaniya istehsalı olan ən müasir avadanlıqla, avtomatik idarəetmə sistemi ilə təchiz olunan, müvafiq maddi-texniki və maliyyə resursları ilə təmin edilən zavod fasiləsiz fəaliyyət göstərir. Boruların betonla üzlənməsi işlərini neftçilərin peşə bayramı ərəfəsində - sentyabrın 15-dək başa çatdırmaq nəzərdə tutulmuşdur. Sentyabrın 20-də isə “Süleyman Vəzirov” borudüzən gəmisi vasitəsilə kəmərin çəkilişinə başlanacaqdır.
Bölmənin digər xəbərləri
