Böyük Britaniya hökuməti sığınacaq məsələləri ilə bağlı beynəlxalq hüquq qaydalarının tətbiqinə yenidən baxacaq
London, 1 oktyabr, AZƏRTAC
Böyük Britaniyanın Baş naziri Kir Starmer ölkədə sığınacaq axtaranların deportasiyadan yayınmaq üçün insan haqları qanunlarından sui-istifadəsinə qarşı ciddi addım atacağını bəyan edib.
AZƏRTAC BBC-yə istinadla xəbər verir ki, Baş nazir Avropa İnsan Haqları Məhkəməsinin qərarlarının Böyük Britaniya məhkəmələrində tətbiq edilməsinə yenidən baxılacağını açıqlayıb. Bu dəyişiklik nəticəsində sığınacaq axtaranlar vətənlərinə qaytarılarkən işgəncə riski ilə üzləşəcəklərini iddia edərək, deportasiyadan yayınmaq imkanını itirə bilərlər. Bundan əlavə, ailələrindən ayrılmamaq arqumenti ilə də ölkədə qalmaq hüququ məhdudlaşdırıla bilər.
Bu açıqlama Kir Starmerin siyasətində növbəti böyük dönüş kimi qiymətləndirilir.
Qeyd edək ki, Baş nazir əvvəllər insan haqları üzrə vəkil və Avropa İnsan Haqları Məhkəməsinin müdafiəçisi olub.
Baş nazirin qərarı son dövrlərdə miqrasiya məsələlərində sərt mövqe nümayiş etdirən Reform UK partiyasının lideri Naycel Farajla siyasi rəqabət fonunda verilib.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
