DÜNYA
Böyük Britaniyada dambanın dağılma təhlükəsi aradan qaldırılır
![Böyük Britaniyada dambanın dağılma təhlükəsi aradan qaldırılır](/files/2019/2/1200x630/1564754509553122591_1200x630.jpg)
Bakı, 2 avqust, AZƏRTAC
Böyük Britaniyada hərbi helikopterin köməyi ilə su rezervuarının üzərindəki dambanın dağılma təhlükəsi aradan qaldırılır. AZƏRTAC BBC telekanalının saytına istinadla xəbər verir ki, leysan yağışları nəticəsində ciddi zərər görmüş hidroelektrik stansiyasının bəndinin tamamilə uçması İngiltərənin mərkəzində yerləşən Ueyli Bric yaşayış məntəqəsinin məhv olmasına gətirib çıxaracaq. Polisin məlumatına görə, artıq bu ərazidə yaşayan 6 min nəfər təxliyə edilib.
Britaniya rəsmiləri bildirirlər ki, helikopter 300 milyon qallon suyu rezervuara qaytaran dambanın üzərinə ballast kisələri boşaldır. Onun dağılma təhlükəsi artdığından, insanların təxliyəsi prosesi də gücləndirilib. Baş Nazir Boris Conson Ətraf Mühitin Mühafizəsi nazirinə mütəxəssislərin və xilasedicilərin iştirakı ilə təcili iclas keçirməyi tapşırıb.
Kral Hərbi Hava Qüvvələrinin məlumatına görə, Chinook helikopteri indiyədək dambanın üzərinə 400 ton ağırlığında qum, çınqıl və daş qarışığı olan ballast kisələri boşaldıb. Ərazidəki Derbişir əyalətinin konsteblinin köməkçisi dambanın dağılması riskinin sona çatması elan edilənə qədər sakinləri evlərinə qayıtmamağa çağırıb. Hazırda rezervuardakı su xüsusi texnika vasitəsilə boşaldılır və Qoyt çayının da daşması təhlükəsi olduğu bildirilir