Böyük Britaniyada sığınacaq sistemi ilə bağlı əsas dəyişikliklər qüvvəyə minir
London, 2 mart, AZƏRTAC
Böyük Britaniyada sığınacaq sistemi ilə bağlı genişmiqyaslı dəyişikliklər bu gündən qüvvəyə minir.
AZƏRTAC BBC-yə istinadla xəbər verir ki, daxili işlər naziri Şabana Mahmud bildirib ki, bundan sonra ölkədə qaçqın statusu alan şəxslərə yalnız müvəqqəti qorunma hüququ veriləcək.
Bu qərar son onilliklərdə Böyük Britaniyanın sığınacaq sistemində ən ciddi dəyişikliklərdən biri hesab olunur və hakim partiyanın sol qanadında narazılıq doğura biləcəyi vurğulanır. Lakin dəyişikliklər mövcud qaydaların yenilənməsi yolu ilə həyata keçirildiyi üçün parlament səsverməsinə çıxarılmadan qüvvəyə minəcək.
Yeni qaydalara əsasən, sığınacaq alan şəxslərin işi hər 30 aydan bir yenidən nəzərdən keçiriləcək. Əgər mənşə ölkəsinin təhlükəsiz olduğu qənaətinə gəlinərsə, həmin şəxslər geri göndərilə bilərlər. Qanun müşayiətsiz azyaşlılara şamil edilməyəcək.
Nazirin irəli sürdüyü digər islahat təklifləri isə parlamentdə tam müzakirədən və qanunvericilik prosesindən keçməlidir. Bu dəyişikliklərin ilin sonunadək qüvvəyə minməsi gözlənilir. Həmin təkliflərə əsasən, Böyük Britaniyada daimi yaşayış icazəsi almaq üçün tələb olunan müddət əksər miqrantlar üçün 5 ildən 10 ilə qaldırılacaq. Qaçqın statusu alan şəxslər üçün isə bu müddət 20 ilə qədər uzadıla bilər.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
