Böyük Britaniyanın elektrik enerjisinə görə xarici ölkələrdən asılılığı artıb
London, 21 oktyabr, AZƏRTAC
Böyük Britaniya son illərdə xaricdən elektrik enerjisi idxalına daha çox möhtac olub.
AZƏRTAC “The Telegraph”a istinadla xəbər verir ki, Fransa kimi qonşu ölkələrdən dənizaltı kabel xətləri vasitəsilə idxal olunan elektrik enerjisi cari ilin ilk doqquz ayında Böyük Britaniyanın ümumi enerji istehlakının 16 faizini təşkil edib. Bu göstərici ötən ilin eyni dövrü ilə müqayisədə artaraq rekord həddə çatıb.
İyul ayında idxal payı 19,5 faizlə ən yüksək səviyyəyə yüksəlib. Nüvə Sənayesi Assosiasiyası bildirib ki, Böyük Britaniyada nüvə enerjisinin əsas yük gücü Fransaya nisbətən xeyli azdır. Bu da elektrik enerjisi qiymətlərinin artmasına və idxaldan asılılığın güclənməsinə səbəb olur.
Beynəlxalq Enerji Agentliyinin məlumatına əsasən, 2024-cü ilin 19 oktyabr tarixinədək Böyük Britaniyada elektrik enerjisinin orta qiyməti megavatt-saata görə 85 funt-sterlinq, Fransada isə 69 avro təşkil edib. Ekspertlər bildirirlər ki, bu fərq səbəbindən Böyük Britaniya əksər hallarda elektrik enerjisini xalis idxalçı kimi qəbul edir.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
