“BÖYÜK İPƏK YOLU” LAYİHƏSİ ÇƏRÇİVƏSİNDƏ
Dünya Bankının aparıcı iqtisadçısı Anti Talzitinin başçılığı ilə bu təşkilatın ekspertləri “Böyük İpək yolu” layihəsinin həyata keçirilməsinin gedişi ilə tanış olmaq üçün yanvarın 26-da Bakıya gələcəklər. Onlar Nazirlər Kabinetində və İqtisadi İnkişaf Nazirliyində görüşlər keçirəcəklər.
Dünya Bankının Azərbaycandakı ofisindən AZƏRTAC-ın müxbirinə bildirmişlər ki, bankın Direktorlar şurasının ötən ilin iyununda təsdiq etdiyi layihəni gerçəkləşdirmək üçün 40 milyon dollar ayrılmışdır. Bankın bölməsi olan Beynəlxalq İnkişaf Assosiasiyasının /BİA/ bu krediti Bakı-Gürcüstan avtomagistralının Gəncə-Qazax hissəsinin tikintisinə sərf olunacaqdır. Avtomagistralın digər hissələrinin inşası Küveyt fondu və Avropa Yenidənqurma və İnkişaf Bankı tərəfindən maliyyələşdirilir.
Dünya Bankının Azərbaycandakı ofisinin mütəxəssisləri vurğulamışlar ki, respublika hökuməti avtomaqistralın Qırmızı körpüyə qədər olan hissəsinin tikintisini maliyyələşdirməyi bankdan xahiş etmişdir.
Xatırladaq ki, BİA-nın kreditləri faizsizdir və onillik möhlət də daxil olmaqla 35-40 ilə ödəniləcəkdir.
Bölmənin digər xəbərləri
