Britaniya Çaqos adalarının suverenliyini Mavrikiyə verməklə bağlı sazişi imzalayıb
London, 22 may, AZƏRTAC
Böyük Britaniya Çaqos adalarının suverenliyini Mavrikiyə verməyi, əvəzində isə oradakı strateji hərbi bazanı illik 101 milyon funt sterlinq müqabilində 99 illik icarəyə götürməyi nəzərdə tutan sazişi imzalayıb.
AZƏRTAC BBC-yə istinadla xəbər verir ki, hökumət bu sazişin ümumi dəyərinin 3,4 milyard funt sterlinq olacağını bildirib. Saziş bu gün səhər yerli vaxtla saat 02:25-də məhkəmə qərarı ilə dayandırılsa da, həmin qərar günorta saat 12:30-dan sonra ləğv olunub və proses davam etdirilib.
Böyük Britaniyanın Baş naziri Kir Starmer bu sazişi ölkənin milli maraqları baxımından mühüm addım adlandırıb. O bildirib ki, Hind okeanında yerləşən Dieqo Qarsiya hərbi bazası Böyük Britaniya və ABŞ üçün həyati əhəmiyyət daşıyan imkanlar təqdim edir. Hökumət bəyan edib ki, Dieqo Qarsiya bazası hərbi məqsədlərlə istifadə olunmağa davam edəcək və bu razılaşma “Beş Göz” adlı kəşfiyyat alyansına (Böyük Britaniya, ABŞ, Kanada, Avstraliya və Yeni Zelandiya) daxil olan ölkələr tərəfindən təsdiqlənib.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
