Britaniyada tibbi səhlənkarlıq iddiaları 60 milyard funta yüksəlib
London, 17 oktyabr, AZƏRTAC
Britaniyada Milli Səhiyyə Xidmətinin (NHS) tibbi səhlənkarlığa görə ümumi öhdəlikləri 60 milyard funt sterlinqə yüksəlib.
AZƏRTAC xəbər verir ki, bu barədə Böyük Britaniyanın Milli Audit Ofisinin (NAO) hesabatında bildirilib. Bu rəqəmin artmasına əsas səbəb kimi iddiaların sayının çoxalması, hər bir iddia üzrə ödənilən məbləğin artması və hüquqi xərclərin sürətlə yüksəlməsi göstərilib. Hesabata əsasən, bu məbləğ mart ayının sonuna qədər daxil olmuş və ya hələ təqdim olunmamış bütün klinik səhlənkarlıq iddialarını ödəmək üçün tələb olunan ümumi vəsaiti əks etdirir.
NAO qeyd edib ki, klinik səhlənkarlıq hökumətin balans hesabatında nüvə obyektlərinin ləğvindən sonra ikinci ən böyük öhdəlik hesab olunur. Mövcud göstərici 2006-2007-ci illərlə müqayisədə dörd dəfə artıb. Qurumun məlumatına görə, uğurlu iddialarda iddiaçı tərəfin hüquqi xərcləri NHS-nin müdafiə xərclərindən xeyli çox artıb. 2006-2007-ci illərdə iddiaçıların hüquqi xərcləri 148 milyon funt təşkil edirdisə, 2024-2025-ci illərdə bu rəqəm 538 milyon funta çatıb və bu da bağlanmış iddiaların ümumi dəyərinin 15 faizini təşkil edir.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
