SİYASƏT
Brüssel Azərbaycan Evi tərəfindən beynəlxalq təşkilatlara bəyanat ünvanlanıb
Bakı, 9 dekabr, AZƏRTAC
Şuşa və Füzuli rayonlarında mina partlaması nəticəsində daha iki azərbaycanlı mülki şəxsin - Zamin Həsənli və Rahim Həbibovun ağır yaralanması xəbəri Belçikada yaşayan Azərbaycan icmasını hiddətləndirib.
Diasporla İş üzrə Dövlət Komitəsindən AZƏRTAC-a bildiriblər ki, Brüssel Azərbaycan Evi adından beynəlxalq təşkilatlara ünvanlanan bəyanatda bu xəbər Ermənistanın yerləşdirdiyi minaların Azərbaycanda insan həyatı üçün təhlükə yaratmasının davam etməsi kimi qiymətləndirilib.
Qeyd edilib ki, 44 günlük müharibənin bitməsindən bəri Azərbaycanda mina qurbanlarının sayı 340 nəfərə çatıb.
Yaşamaq hüququnun ən əsas insan hüquqlarından biri olduğunu xatırladan birlik beynəlxalq ictimaiyyəti humanitar minatəmizləmənin BMT-nin dayanıqlı inkişafının 18-ci hədəfi kimi tanınmasını dəstəkləməyə çağırıb.