Bu il dünya fərdi kompüterlər bazarında artım gözlənilir
Bakı, 27 may, AZƏRTAC
“International Data Corporation” (IDC) analitik şirkəti dünya fərdi kompüterlər bazarı üzrə cari və sonrakı illər üçün proqnoz dərc edib. Proqnoza əsasən qlobal elektron komponent çatışmazlığına baxmayaraq 2021-ci ildə fərdi kompüterlər bazarı sahəsi üzrə artım gözlənilir.
AZƏRTAC xarici saytlara istinadla xəbər verir ki, açıqlanan məlumatlarda ənənəvi masaüstü kompüterlər, noutbuk və müxtəlif işçi stansiyalarının tədarükü nəzərə alınıb. Planşetlər, klaviaturası ayrılan hibrid noutbuklar və “x86” arxitekturalı serverlər nəzərdən keçirilmir.
Analitiklərin fikrincə, bu il dünya miqyasında fərdi kompüterlərin tədarük həcmi 357 milyon ədəd təşkil edəcək. Bu proqnoz özünü doğruldacağı təqdirdə ötən ilə nisbətdə artım 18,1 faiz səviyyəsində olacaq.
Tədarük həcminin əhəmiyyətli dərəcədə artması davam edən pandemiya şəraitində distant təhsil və məsafədən iş platformalarının sürətli inkişafı ilə izah olunur. Lakin növbəti ildə vəziyyətin dəyişəcəyi proqnozlaşdırılır. “IDC” mütəxəssislərinin qənaətinə görə, fərdi kompüterlərin satışı illik hesablamada 2,9 faiz azalacaq.
Beşillik müddətə nəzər saldıqda, “CAGR” göstəricisi (mürəkkəb faizlərdə ortaillik artım tempi) 3 faiz səviyyəsində proqnozlaşdırılır.
Bölmənin digər xəbərləri
