BUZLAMIŞ BALIQLAR DİRİLMİŞDİR
Son zamanlar bayram günləri iranlılar süfrəyə balıq-plov verməyə adət ediblər. İçi bişmiş göyərti ilə doldurulmuş karp balığı ilə plovu isə daha çox xoşlayırlar.
AZƏRTAC-ın Tehrandan aldığı xəbərdə deyilir ki, Şiraz şəhərinin sakini ailə bayramı günlərindən birini məhz həmin balıqdan hazırlanmış yeməklə qeyd etmək istəyir. Bunun üçün o, bazardan hərəsi bir kiloqramdan artıq olan üç diri karp balığı alır. Bayrama hələ vaxt qaldığı üçün o, balıqları soyuducunun buzxanasına qoyur.
Səhərisi balıqların donunu açmaq üçün onların üstünə su tökdükdə kişi yerindəcə donub qalır: balıqlar dirilmişdilər... Onları su ilə dolu ləyənə atanda, karplar, heç nə olmamış kimi üzməyə başlayırlar. Buna baxmayaraq, plov öz qaydasınca hazırlanır. Lakin ikicə balıqdan...Üçüncü “möcüzə” isə hələ də ləyəndə üzməkdədir...
