CƏLİL MƏMMƏDQULUZADƏNİN XATİRƏSİ YAD EDİLMİŞDİR
Cəlil Məmmədquluzadənin Bakıdakı ev muzeyində “Həmidə xanımın xatirələrində Mirzə Cəlil şəxsiyyəti” mövzusunda xatirə gecəsi keçirilmişdir.
Muzeyin direktoru Pərixanım Mahmudova gecəni açaraq, ev muzeyinin eksponatlarla zənginləşdirilməsi və Mirzə Cəlilin əsərlərinin təbliği ilə bağlı görülən işlərdən danışmışdır.
Filologiya elmləri doktoru, professor Xeyrulla Məmmədov , yazıçı-publisist Şəmistan Nəzirli və başqaları Azərbaycan ədəbiyyatının və mətbuatının inkişafında, xalqımızın maarifləndirilməsində Cəlil Məmmədquluzadənin əvəzsiz xidmətlərindən, onun nəsil şəcərəsindəki görkəmli şəxsiyyətlərdən söz açmış, ədibin ömür-gün yoldaşı Həmidə xanımın onun həyatındakı rolunu xüsusi vurgulamışlar.
Bu ailənin qohumlarından olan Adil Kəngərli muzeyin əməkdaşlarına və xatirə gecəsinə toplaşanlara minnətdarlığını bildirmişdir.
Axırda məktəblilərin ifasında bədii kompozisiya göstərilmişdir.
Bölmənin digər xəbərləri
