Çex Respublikasında 33-cü Beynəlxalq pivə festivalı keçiriləcək
Praqa, 12 aprel, AZƏRTAC
Çex Respublikasının Litomerjitsa şəhərində ənənəvi 33-cü Beynəlxalq pivə festivalı keçiriləcək. Dequstatorlar aprelin 18-dən 22-dək 1200 pivə və sidr nümunələrini qiymətləndirməlidir. Son iki gün köpüklü içki həvəskarları hazırda müntəzəm satışda görünməyən növlərin dadına baxa biləcəklər.
AZƏRTAC xəbər verir ki, festivalda dünyanın hər bir yerindən 250 pivə zavodunun iştirakı gözlənilir. Burada Çili, Macarıstan, Polşa, Almaniya, Avstriya və digər ölkələrdən iri pivə şirkətlərinin, o cümlədən İspaniyadan üç ən böyük istehsalçının nümayəndələri iştirak edəcəklər.
Hazırda bu tədbir Mərkəzi Avropada ən böyük pivə festivallarından biri hesab olunur (Avropada ən böyük festival - Münxendəki Oktoberfest hesab olunur). Festival bu vaxta kimi Çeske-Budeyovitsada keçirilib, indi isə Litomerjitsa köçürülüb.
Vüqar Seyidov
AZƏRTAC-ın xüsusi müxbiri
Praqa
Bölmənin digər xəbərləri
