Çexiya hərbi büdcəsini artırmağı planlaşdırır
Praqa, 23 may, AZƏRTAC
Çexiya hökuməti hər il ÜDM-in təxminən 5 faizini müdafiə sahəsinə yönəltmək məsələsini nəzərdən keçirə bilər.
AZƏRTAC xəbər verir ki, bu barədə ölkənin Baş naziri Pyotr Fiala “Deník.cz” saytına müsahibəsində Prezident Pyotr Pavelin bəyanatını şərh edərkən bildirib.
Şimali Atlantika Alyansının (NATO) iyun ayında Haaqada keçiriləcək sammitində üzv olan ölkələrin müdafiə xərclərinin artırılması məsələsi müzakirə olunacaq. Brüsseldə NATO-nun Baş katibi Mark Rütte ilə keçirdiyi görüşdən sonra Prezident Pyotr Pavel bildirib ki, əgər sammitdə hərbi xərclərin ÜDM-in 5 faizinə qədər artırılması ilə bağlı ümumi razılıq əldə olunarsa, Çexiya Respublikası bu təşəbbüsü dəstəkləməyə hazırdır. Baş nazir Fiala bu məsələni Prezidentlə əvvəlcədən müzakirə etdiyini bildirib.
“Reuters”in məlumatına görə, Mark Rütte ölkələrə birbaşa hərbi xərcləri ÜDM-in 3,5 faizinə çatdırmağı, əlavə olaraq 1,5 faizini isə müdafiə ilə əlaqəli ehtiyaclara yönəltməyi təklif edir. Bu yanaşma ABŞ Prezidenti Donald Trampın NATO müttəfiqlərinə yönəltdiyi ÜDM-in 5 faizinin müdafiəyə sərf olunması tələbinə cavab verə bilər. Lakin, hazırda bu hədəfə hətta ABŞ belə çatmayıb.
Xatırladaq ki, ötən il Çexiya Respublikası ilk dəfə olaraq NATO-nun əvvəlki məqsəd göstəricisi olan ÜDM-in 2 faizini müdafiəyə ayırmağa nail olub. Hökumət 2030-cu ilə qədər bu göstəricini 3 faizə çatdırmağı öhdəsinə götürüb.
Vüqar Seyidov
AZƏRTAC-ın xüsusi müxbiri
Praqa
Bölmənin digər xəbərləri
