Çexiya və Polşanın gömrük xidmətləri iri həcmdə kokain partiyasını ələ keçirib
Praqa, 1 may, AZƏRTAC
Çexiya və Polşa gömrükçüləri şərab qutularında həll edilmiş 12 kiloqram kokain aşkar ediblər.
AZƏRTAC çex mediasına istinadla xəbər verir ki, qara bazar dəyəri bir neçə milyon avro olan narkotiklər Cənubi Amerikadan Polşanın Qdansk limanına göndərilib. Qdansk limanında gömrük əməkdaşları konteynerdəki əsl yükü oxşar qutularla əvəz edərək, onun Polşa-Çexiya sərhədinə qədər hərəkətini izləyiblər. Sərhəddə isə çexiyalı həmkarları üç cinayətkarı saxlayıblar. Bu barədə Çexiyanın Baş Gömrük İdarəsinin Axtarış və nəzarət şöbəsinin əməkdaşları mətbuat konfransında məlumat veriblər.
Sərhədçilər kokain partiyası barədə məlumatı Polşa sərhəd xidmətindən alıblar. Narkotiklərin daşınmasını təşkil edən şəxs Panamada yaşayan polşalı olub. Çexiyanın Baş Cinayət Axtarış İdarəsinin Olomouts şöbəsi sözügedən yük maşınını müsadirə edib, yükü dəyişdirib və karton qutularının rentgen müayinəsini aparıb. Qırx dörd qutudakı preparat distillə olunmuş suda həll edilmiş formada olub.
Keçirilmiş əməliyyat beynəlxalq əməkdaşlığın və daxil olan məlumatlara operativ reaksiya verməyin nə qədər vacib olduğunu göstərir. Belə həcmdə partiyanı əvəz etmək və Ostravadakı anbardan yükü yenidən nəqliyyat vasitəsinə yerləşdirmək, üstəlik, bunu cinayətkarların hiss edə bilmədiyi şəkildə həyata keçirmək o qədər də asan olmayıb. Çexiyanın Narkotiklərlə Mübarizə üzrə Milli Mərkəzinin qənaətinə görə, hazırda dünyada yüksəkkeyfiyyətli kokainin nəzərəçarpacaq dərəcədə artıq istehsalı müşahidə edilir və bu maddə kütləvi şəkildə Avropaya daxil olur.
Praqa
Bölmənin digər xəbərləri
