Çihiru Suzuki: Əminəm ki, Azərbaycanda döyüşümlə iz qoyacağam
Bakı, 2 noyabr, AZƏRTAC
"Vüqar Kərəmov bacarıqlı idmançıdır. Təbii ki, mən də öz bacarığımdan istifadə edəcəyəm".
AZƏRTAC xəbər verir ki, bu sözləri Azərbaycanın MMA idmançısı Vüqar Kərəmovun yaponiyalı rəqibi Çihiru Suzuki “Rizin” Döyüş Federasiyasının Bakıda keçiriləcək “Landmark 7” turniri ilə bağlı təşkil olunmuş mətbuat konfransında deyib.
Dəfələrlə xaricdə yarışlarda iştirak etdiyini söyləyən idmançı öz ölkəsində və ya Azərbaycanda yarışmağın onun üçün fərq etmədiyini deyib: "Hər yerdə döyüşməyə hazıram. Bilirəm ki, həm yaponlar, həm də azərbaycanlılar maraqla bu döyüşü gözləyirlər. Hər iki ölkədə də MMA-ya böyük həvəs var. Ona görə də onlara istədiklərini verməyə çalışacağıq".
O bildirib ki, Vüqar Kərəmovun döyüş üslubundan xəbərdardır: "Mənim üslubum isə ayaqüstə döyüşməkdir. Azərbaycanlı rəqibim mənim hərəkətlərimi soyuqqanlı qarşıladığını söyləyir, amma mən belə düşünmürəm. Onda mənə qarşı aqressiya var. Əslində bu, aramızdakı döyüşün daha maraqlı keçməsinə şərait yaradacaq. Əminəm ki, Azərbaycanda döyüşümlə iz qoyacağam. Buraya çempion olmaq üçün gəlmişəm, çempion kimi də qayıdacağam".
Qeyd edək ki, turnir noyabrın 4-ü start götürəcək.
Bölmənin digər xəbərləri
