Çin hökuməti doğumla bağlı sorğu keçirir
Bakı, 18 oktyabr, AZƏRTAC
Çinin Milli Səhiyyə Komissiyası insanların uşaq dünyaya gətirməyə münasibətinə və övlad sahibi olmaq qorxusuna təsir edən amilləri anlamaq üçün 30 min insan arasında sorğu keçirir.
AZƏRTAC “Reuters” agentliyinə istinadla xəbər verir ki, sorğu hakimiyyət orqanlarının azalan doğum səviyyəsini artırmaq üçün əlindən gələni etdiyi bir vaxtda keçirilir.
Dövlətə məxsus “Qlobal Tayms” qəzeti Çin Əhali və İnkişaf Araşdırmaları Mərkəzinə istinadla yazır ki, sorğuda Çinin 150 əyalətindən və 1500 müxtəlif icmadan insanlar iştirak edəcək.
Hökumət Çinin 2023-cü ildə ikinci il ardıcıl olaraq əhalisinin azaldığını müşahidə etdikdən sonra gənc cütlükləri uşaq sahibi olmağa təşviq etməyə çalışır.
Sorğunun məqsədi “uşaq sahibi olmaq ilə bağlı istəksizlik və qorxunun” təhlilini aparmaq və nəticədə doğum nisbətinin artmasını təşviq etmək üçün dəstək göstərmək və tədbirlər görməkdir.
Bölmənin digər xəbərləri
