ÇİN OLİMPİADA OYUNLARININ MÜHAFİZƏSİ ÜÇÜN XÜSUSİ TƏYİNATLI BÖLMƏLƏR TƏŞKİL ETMİŞDİR
AZƏRTAC xarici KİV-lərə istinadla xəbər verir ki, gələn il ÇXR-də keçiriləcək Olimpiadanın təhlükəsizliyini təmin etmək məqsədi ilə Çin ordusu quru, dəniz və hava qüvvələrindən ibarət xüsusi bölmə təşkil etmişdir.
Xalq Azadlıq Ordusunun (XAO) xüsusi təyinatlı bölməsinin fəaliyyəti qeyri-ənənəvi təhlükələrlə, o cümlədən biokimyəvi və nüvə təhlükələri ilə mübarizəyə yönəldiləcəkdir. XAO-nun xüsusi təyinatlı bölməsi Olimpiadanın bütün meydanlarının havadan müdafiəsinə, yarışların keçirildiyi sahil zolaqlarının dəniz tərəfdən təhlükəsizliyinə cavabdeh olacaqdır.
Pekin olimpiadasının təhlükəsizliyi üzrə komitənin hərbi bürosunun direktoru Tyan İsyan demişdir: “ Bölmə terror aktları ilə yanaşı, təbii fəlakətlər və bədbəxt hadisələr baş verdikdə polisə və silahlı mühafizə bölməsinə kömək edəcəkdir. Pekin Olimpiadasının hərbiləşdirilmiş mühafizə bölməsinin silah-sursatı və hazırlığı Afinadakından yüksək olacaqdır”.
Özünün təhlükəsizlik qüvvələrinə arxalanan Çin hesab edir ki, Afinanın büdcəsinə bərabər məbləğdə - 1,8 milyard ABŞ dolları sərf etməklə Olimpiadanın təhlükəsizliyini təmin edə biləcəkdir.
Ayın əvvəlində antiterror polisi Pekində girovların kütləvi xilas edilməsi üzrə təlimlər keçirmişdir.
Bölmənin digər xəbərləri
