SİYASƏT
Çingiz Qənizadə: Xalqa verilən tarixi vədlərə sadiq olan güclü lider
Bakı, 12 aprel, AZƏRTAC
Dörd il əvvəl - 2018-ci ilin aprelində ölkəmizdə keçirilən prezident seçkilərində İlham Əliyev seçicilərin mütləq əksəriyyətinin səsini qazanaraq dördüncü dəfə Azərbaycan Respublikasının Prezidenti seçildi. 2003-2018-ci illərdə ölkənin nail olduğu dinamik inkişaf kursunun, respublikada bütün sahələrdə, o cümlədən sosial və xarici siyasət sahələrində qazanılmış mühüm nailiyyətlər xalqın gələcəyə olan inamını daha da artırdı. Məhz bu amillər seçicilərin diqqətindən yayınmadı və növbəti dəfə də tərəddüd etmədən İlham Əliyevə etimad göstərdilər.
Prezident İlham Əliyevin son andiçmə mərasimi zamanı “daha heç nə əvvəlki kimi olmayacaq” vədi xalqın ümidlərini daha da artırdı. Axı, dövlətimizin başçısı həmin vaxta qədər verdiyi bütün vədləri layiqincə yerinə yetirmişdi.
Bu fikirləri AZƏRTAC-a Demokratiya və İnsan Hüquqları Komitəsinin sədri, hüquq üzrə fəlsəfə doktoru Çingiz Qənizadə söyləyib.
Hüquq müdafiəçisi deyib ki, 2018-ci ildə keçirilən seçkilərə qədər Azərbaycan bütün sahələr üzrə yüksək nailiyyətlər qazanıb. Ölkəmizin beynəlxalq aləmdəki nüfuzu xeyli yüksəlib. Bu müddət ərzində əhalinin rifahı əsaslı surətdə yaxşılığa doğru dəyişilib. Prezident İlham Əliyevin sosial-iqtisadi siyasətinin mərkəzində vətəndaş rifahının təminatı prinsipinin dayanması ölkədə sosial ödənişlərin ardıcıl şəkildə artırılmasında da öz təsdiqini tapır. 2003-2018-ci illərdə ümumi daxili məhsulun 3,2 dəfə artdığı ölkəmizdə əhalinin nominal gəlirləri 8,6 dəfə, minimum əməkhaqqı 12,9 dəfə, əməkhaqları təxminən 7 dəfə, pensiyalar 10 dəfədən çox artıb. 2018-ci ildən sonrakı köklü sosial islahatlar bu istiqamətdə inqilabi irəliləyişlərə nail olunması ilə nəticələnib.
Ç.Qənizadə bildirib ki, son dörd ildə ölkə həyatının bütün sahələrində inqilabi dəyişikliklər baş verib. Hələ 2019-cu ildə sosial ödənişlər orta hesabla 100 faiz, bəzi sahələrdə daha çox artıb. 2020-ci və 2021-ci illərdə də sosial ödənişlərdə növbəti artımlar (indeksasiya, təqaüd artımları) edildi. Pandemiyanın məşğulluğa və rifaha mənfi təsirlərinin qarşısının alınması üçün genişmiqyaslı dəstək proqramları icra olundu. 2022-ci ilin əvvəlindən isə 3,4 milyon şəxsi əhatə edən əməkhaqqı, pensiya və digər sosial ödənişlər artırıldı və bunun üçün də illik əlavə 2,1 milyard manat ayrıldı. Son 4 ildə minimum əməkhaqqı 2,3 dəfə, orta aylıq əməkhaqqı 40 faizə yaxın, median əməkhaqqı 74 faiz artıb. Minimum pensiyada 2,2 dəfə, orta pensiyada 65 faiz artım, müavinət və təqaüdlərdə orta hesabla 2,5-3 dəfə, bəzi istiqamətlərdə 3 dəfədən çox artım baş verməsi verilən vədlərə sadiqliyin bariz nümunəsidir.
Ölkədə baş verən köklü islahatlardan da danışan komitə sədri deyib: “Dövlətimizin başçısının tapşırıqları ilə 2018-ci ildən Azərbaycanda başlanan köklü sosial islahatlar vətəndaş rifahı və məmnunluğunun təminatı istiqamətində inqilabi addımların atılmasına, sosial müdafiə və sosial təminat, məşğulluq, əmək münasibətləri, tibbi-sosial reabilitasiya və sosial sahənin digər sektorları üzrə ötən 4 illik bir dönəmdə ciddi irəliləyişlərə imkan verdi. Beləliklə, Prezident İlham Əliyevin 2018-ci il aprelin 11-də andiçmə mərasimində söylədiyi “Hamımızın amalı ondan ibarətdir ki, ölkəmiz daha da güclənsin, daha da qüdrətli dövlətə çevrilsin, Azərbaycan vətəndaşları daha da yaxşı yaşasınlar” sözləri özünü real hadisələrlə doğrultdu. 2020-ci il noyabrın 10- da Ermənistan ordusunun Azərbaycan Silahlı Qüvvələri qarşısında diz çökməsi son dörd ilin möhtəşəm uğuru oldu”.
Bu möhtəşəm uğurun qazanılmasından söhbət açan hüquq müdafiəçisi deyib ki, Prezident, Ali Baş Komandan İlham Əliyevin rəhbərliyi ilə Azərbaycan Ordusunun Ermənistan üzərindəki tarixi Qələbəsi ölkəmizin, eləcə də Ordumuzun gücünü dünyaya nümayiş etdirdi. Rəşadətli Ordumuz öz gücü hesabına işğalçı Ermənistana qalib gələrək Azərbaycanı bütövləşdirdi və dünyanın ən güclü ordularından biri olduğunu təsdiqlədi. Bu tarixi Qələbədən sonra Cənubi Qafqazda yaranmış reallıqlar beynəlxalq aləmdə də etiraf olunur. Dövlətimizin başçısının düşünülmüş strategiyası nəticəsində ölkəmiz indiki mürəkkəb dövrdə də uğurlara imza atmaqdadır. Müzəffər Ali Baş Komandan İlham Əliyevin rəhbərliyi ilə azad edilmiş Qarabağ yenidən qurulur. Həmin ərazilərdə yenidənqurma, tikinti- quraşdırma, abadlıq işləri geniş vüsət alıb. Bütün işlər ardıcıllıqla və planlı şəkildə həyata keçirilir. Artıq dünyanın bir sıra şirkətləri də yenidənqurma işlərinə qoşulub. Əminliklə demək olar ki, Şuşanın, Ağdamın, Füzulinin, Zəngilanın, Cəbrayılın baş planlarının hazırlanması və bu kimi fəaliyyətlər qısa zamanda Qarabağın cənnətə çevriləcəyinə böyük inam yaradır.
Ç.Qənizadə bu müddət ərzində xarici siyasət sahəsində qazanılan uğurlarımızdan da danışıb. Vurğulayıb ki, bu nailiyyətlər ölkəmizin təhlükəsizliyinin təmin olunmasında mühüm rol oynayıb. Azərbaycan, Türkiyə və Pakistanın parlament sədrlərinin Bakıda keçirilən birinci üçtərəfli toplantısının yekununda qəbul edilmiş Bakı Bəyannaməsi, Prezident İlham Əliyevin və Türkiyə Respublikasının Prezidenti Rəcəb Tayyib Ərdoğanın Azərbaycanın və bütövlükdə Türk dünyasının qədim mədəniyyət beşiyi olan Şuşa şəhərində görüşü və Şuşa Bəyannaməsinin imzalanması, Moskvada “Azərbaycan Respublikası ilə Rusiya Federasiyası arasında müttəfiqlik qarşılıqlı fəaliyyəti haqqında” Bəyannamənin imzalanması ölkəmizin beynəlxalq aləmdəki mövqeyini daha da möhkəmləndirib.