ÇİRKLİ SU DÜNYADA HƏR ON XƏSTƏLİKDƏN BİRİNİN SƏBƏBİDİR
Çirkli və içməyə yararsız su dünyada hər on xəstəlikdən birinin və bütün ölüm hallarının 6 faizinin səbəbidir. AZƏRTAC xəbər verir ki, bu məlumat Dünya Səhiyyə Təşkilatının məruzəsində yer almışdır.
Sənəddə vurğulanır ki, “içməli suyun çatışmazlığı problemi, təmizləyici qurğuların yoxluğu və ən adi sanitariya-gigiyena normalarına riayət edilməməsi hər il dünyada bütün xəstəlik hallarının 9,1 faizinə səbəb olur”. Özü də bunun əsas qurbanları uşaqlardır. İstifadəyə yararsız su 14 yaşınadək uşaqlar arasında xəstəlik hallarının 22 faizini təşkil edir.
Tədqiqat müəllifləri bu sahədə inkişaf etmiş və yoxsul ölkələr arasında böyük fərq olduğunu vurğulayırlar. Qabaqcıl ölkələrdə keyfiyyətsiz sudan ölüm halları 1 faizdən az olduğu halda, inkişaf etməkdə olan ölkələrdə orta hesabla 10 faiz təşkil edir. Çirkli sudan istifadə nəticəsində ölüm hallarının ən yüksək göstəricisi Anqolanın payına düşür (24 faiz).
Məruzədə deyilir: “Yoxsul ölkələrin əhalisinin içməyə yararsız sudan istifadə etməsi malyariya, denge qızdırması, müxtəlif mədə-bağırsaq xəstəliklərinin yayılmasının əsas səbəbidir”.
Bölmənin digər xəbərləri
