CİNAYƏTKARLIQLA MÜBARİZƏ VƏ İCTİMAİ TƏHLÜKƏSİZLİYİN TƏMİNİ SAHƏSİNDƏ UĞURLU GÖSTƏRİCİLƏR ƏLDƏ OLUNMUŞDUR
Nazirliyin mətbuat xidmətindən AZƏRTAC-a bildirmişlər ki, iclası nazir, general-polkovnik Ramil Usubov açaraq, gündəlikdəki hər üç məsələnin çox mühüm və aktual, polisin əsas fəaliyyət istiqamətlərindən olduğunu bildirmiş, göstərilən sahələrdə kifayət qədər müsbət nəticələr qazanıldığını xatırlatmış, onların daim DİN rəhbərliyinin, Kollegiyasının diqqətində olduğunu vurğulamışdır. O qeyd etmişdir ki, şəhər və rayonlarda asayişin qorunması, daxili işlər orqanlarının çoxsaylı qurumlarından biri kimi, post-patrul xidmətinin işindən əhəmiyyətli dərəcədə asılıdır və son illər bu xidmətdə mənəvi-psixoloji durum, təchizat məsələləri xeyli yaxşılaşmışdır. Ramil Usubov daxili işlər orqanlarının bu sahədəki fəaliyyətinə tənqidi yanaşmağın, buraxılmış nöqsan və çatışmazlıqların ciddi şəkildə müzakirə olunması və aradan qaldırılmasının vacibliyini qeyd etmişdir.
Nazir bildirmişdir ki, cinayətkarlıqla mübarizə və ictimai təhlükəsizliyin təmini sahəsində əvvəllər qazanılmış müsbət meyillər cari ilin 5 ayında da davam etdirilmiş, uğurlu göstəricilər əldə olunmuşdur. O qeyd etmişdir ki, ölkədə gedən geniş quruculuq işləri daxili işlər orqanlarının fəaliyyətində də öz əksini tapmış, Prezident İlham Əliyevin apardığı siyasət bütün istiqamətlərdə Azərbaycan dövlətinin uğurlu inkişafını təmin etmiş, ölkəmizin iqtisadi yüksəlişi, tərəqqisi, eyni zamanda, hüquq mühafizə, o cümlədən daxili işlər orqanlarının da fəaliyyətinə təsir göstərmişdir. Ölkə Prezidentinin gündəlik diqqət və qayğısı, həmçinin, tələbkarlığı daxili işlər orqanlarının üzərinə respublikamızda sabitliyi, əmin-amanlığı bundan sonra da nümunəvi və etibarlı şəkildə qorumaq kimi məsuliyyətli vəzifə qoyur.
Gündəlikdəki ilk məsələ haqqında DİN Cinayət Axtarışı Baş İdarəsinin rəisi, polis polkovniki Emin Şəkinski çıxış edərək bildirmişdir ki, ötən il quldurluq və soyğunçuluq cinayətləri törətmiş 224 şəxs həyata keçirilmiş tədbirlər nəticəsində aşkar edilmiş, axtarışda olan 91 təqsirləndirilən şəxs tutulmuş, 38 cinayətkar yaxalanıb zərərsizləşdirilmişdir. Qeydə alınmış 165 quldurluq hadisəsindən 119-nun və ya 72,1 faizinin, 196 soyğunçuluq cinayətindən isə 174-nün və ya 88,8 faizinin üstünün açılması təmin edilmişdir.
İctimai Təhlükəsizlik Baş İdarəsinin rəisi, polis general-mayoru Cavanşir Məmmədov respublikanın şəhər və rayonlarında post-patrul xidmətinin təşkili sahəsində işin vəziyyəti haqqında məlumat verərək demişdir ki, post-patrul xidmətinin fəaliyyətinin səmərəliliyinin artırılması diqqət mərkəzində olmuş, bu yöndə bir sıra tədbirlər həyata keçirilmişdir. Qeyd olunmuşdur ki, 2004-cü ilə nisbətən ictimai yerlərdə qeydə alınmış cinayətlər 3,6 faiz, o cümlədən küçələrdə 6,9 faiz azalmış, axtarışda olanların tutulması üzrə naryadların göstəriciləri 2,8 faiz artmışdır.
Kadrlar Baş İdarəsinin rəisi, polis general-mayoru Məmməd Əsgərov daxili işlər orqanlarında əməkdaşların peşə hazırlığının təşkili işinin vəziyyəti ilə bağlı məruzə etmiş, peşə hazırlığı sisteminin, müxtəlif kurs, seminar və toplanışların mövzu planlarının günün tələblərinə uyğunlaşdırıldığını, 2005-2006-ci illərdə belə tədbirlərə 3507 əməkdaşın cəlb olunduğunu bildirmişdir.
Daxili işlər nazirinin müavini, polis general-leytenantı Əsgər Ələkbərov son illər DİN rəhbərliyi səviyyəsində peşəkar kadr özəyinin yaradılması, şəxsi heyətin peşə və fiziki hazırlığının daha da yüksəldilməsi, həmçinin mənəvi-psixoloji durumun sağlamlaşdırılması istiqamətində xeyli iş görüldüyünü vurğulamışdır.
Müzakirələrdə Bakı Şəhər Baş Polis İdarəsinin rəis müavini polis polkovniki Şahmar Paşayev, rayon polis idarə və şöbələrinin rəisləri və başqaları çıxış edərək, buraxılmış nöqsanlardan danışmış, onların aradan qaldırılması üçün tədbirlərin görüləcəyini bildirmişlər.
Kollegiya iclasına yekun vuran nazir Ramil Usubov quldurluq və soyğunçuluqla mübarizənin kollegiya iclasının gündəliyinə çıxarılması zərurətini onların ictimai təhlükəlilik və əks-səda doğurma dərəcəsi ilə əlaqələndirmişdir. Nazir qeyd etmişdir ki, yerli polis orqanlarının rəisləri və aidiyyəti əməkdaşlar bu növ cinayətlərin üstünün açılmasına bəzən məsuliyyətsiz yanaşır və belə vəziyyət vətəndaşların haqlı narazılığına səbəb olaraq, bütövlükdə, polisin nüfuzuna mənfi təsir göstərir. Kurator nazir müavininin rəhbərliyi ilə CABİ və paytaxt polisinin təcrübəli əməkdaşlarından ibarət xüsusi qrupun yaradıldığını diqqətə çatdıran Ramil Usubov, bu qrupun yerli polis orqanları ilə birgə səmərəli fəaliyyəti nəticəsində əvvəllər bağlı qalmış bu növ cinayətlərin açılması sahəsində əsaslı dönüşün yaradılacağına inandığını bildirmişdir.
Daxili işlər naziri şəhər, rayon polis orqanlarının rəislərindən şəxsi heyətin geyim qaydalarına, nizam-intizama ciddi riayət etmələrini daim nəzarətdə saxlamağı, əməkdaşların fiziki, peşə və döyüş hazırlıqları səviyyəsinin yüksəldilməsi məsələlərinə diqqət yetirməyi tələb etmiş, bu vacib işə səhlənkar münasibət bəsləyən vəzifəli şəxslər barəsində ciddi intizam və təşkilati tədbirlərin görüləcəyini bildirmişdir.
Nazir əmin olduğunu bildirmişdir ki, Prezident, Ali baş komandan İlham Əliyevin DİN-ə göstərdiyi böyük diqqət və qayğı daxili işlər orqanlarını bundan sonra da qarşıya qoyulmuş məsul vəzifələrin öhdəsindən layiqincə gəlməyə sövq edəcək, şəxsi heyəti cinayətkarlıqla mübarizə və ictimai qaydanın, təhlükəsizliyin təmini sahəsində daha yüksək nəticələr qazanmağa ruhlandıracaqdır.
Bölmənin digər xəbərləri
