CİU-CİTSU-ÜZRƏ AZƏRBAYCAN ÇEMPİONATI KEÇİRİLMİŞDİR
AZƏRTAC xəbər verir ki, fevralın 17-də “Start” idman mərkəzində ciu-citsu üzrə yeniyetmələr və böyüklər arasında Azərbaycan birinciliyi keçirilmişdir. Yarışda paytaxt təmsilçiləri ilə yanaşı, Qazax, Yevlax, Gəncə və Ucardan 8 komandanın heyətində 70-dək idmançı mübarizə aparmışdır.
Təntənəli açılış mərasimində çıxış edən Azərbaycan Ciu-Citsu Federasiyasının prezidenti Mirəli Seyidov iştirakçılara uğurlar arzulayaraq, yarışda fərqlənmiş idmançıların ölkəmizi beynəlxalq yarışlarda layiqincə təmsil edəcəklərinə ümid bəslədiyini vurğulamışdır. Qurumun birinci vitse-prezidenti Əli Cəfərov isə Prezident İlham Əliyevin diqqət və qayğısı sayəsində bu gün ölkəmizdə həm olimpiya, həm də qeyri-olimpiya idman növlərinin geniş inkişaf etdiyini demişdir.
Qeyd edək ki, qədim döyüş növlərindən olan ciu-citsu orta əsrlərdə yapon samurayları tərəfindən yaradılmışdı. 1998-ci ildə yaradılmış Azərbaycan Ciu-Citsu Federasiyası, bu idman növünün ölkəmizin regionlarında da geniş yayılmasını qarşısına məqsəd qoymuşdur. Mart ayında isə federasiya özünün 10 illik yubileyini təntənəli surətdə qeyd edəcəkdir.
Bölmənin digər xəbərləri
