- Möhtərəm cənab Prezident!

Sizin daxili işlər orqanlarının fəaliyyətinə verdiyiniz yüksək qiymət, daxili işlər orqanlarının Azərbaycanın müstəqilliyinin, dövlətçiliyinin qorunmasındakı xidmətlərinə verdiyiniz yüksək qiymət bizi fərəhləndirir, eyni zamanda, məsuliyyətimizi daha da artırır.

Hörmətli cənab Prezident, icazənizlə, son illər Azərbaycanda cinayətkarlığa qarşı mübarizədə görülən işlər haqqında qısaca olaraq Sizə məruzə etmək istəyirəm.

Müstəqil Azərbaycanın qurulmasında, onun dövlətçiliyinin möhkəmləndirilməsində, respublikamızda ictimai-siyasi sabitliyin, təhlükəsizliyin təmin edilməsində, vətəndaşlarımızın qanunla qorunan hüquqlarının müdafiəsində, demokratik dəyərlərə söykənən quruculuq işlərində, bir sözlə, ölkə həyatının bütün sahələrində misilsiz xidmətləri olan ümummilli liderimiz Heydər Əliyev tərəfindən respublikada aparılmış hərtərəfli islahatlar çərçivəsində daxili işlər orqanlarının da fəaliyyətinin təkmilləşdirilməsi, maddi-texniki təchizatının yaxşılaşdırılması, sosial təminatının gücləndirilməsi sahəsində böyük əhəmiyyətə malik işlər görülmüşdür. Ulu öndərimizin xalqımızın rifahı, dövlətimizin inkişafı, o cümlədən Daxili İşlər Nazirliyi sistemində fəaliyyətin müasir standartlar səviyyəsində qurulması yönündə əvəzsiz xidmətlərini peşə bayramımız ərəfəsində bir daha vurğulamağı hər birimizin borcu olmaqla yanaşı, bunu özümüzə şərəf bilirik.

Sizə və Azərbaycan xalqına yaxşı bəllidir ki, müstəqilliyimizin ilk illərində ölkəmiz necə böyük faciələrlə üzləşmişdi. Bir tərəfdən, Ermənistanın Azərbaycana təcavüzü ilə bağlı yaranmış ağır problemlər, digər tərəfdən isə hakimiyyətdə olanların səriştəsizliyi, korporativ maraqları ucbatından baş alıb gedən anarxiya, cinayətkarlıq, hərc-mərclik mövcud idi. Bunun acı nəticələri kimi vətəndaşlarımızın təhlükə, qorxu içində yaşaması, xarici dövlətlərin və iş adamlarının ölkəmizə sərmayə qoyuluşundan ehtiyatlanması bəlli idi. Həmin illəri heç kim, heç kəs yadından çıxarmır və çıxarmayacaqdır.

Məlumdur ki, insanlar həmişə düşdüyü çətin, ağır və çıxılmaz məqamlarda Ulu Tanrıya üz tutaraq, ondan kömək diləyir. Millətimizin həmin dar günündə Ulu Tanrı ona məhz Heydər Əliyev nurunu, Heydər Əliyev şəxsiyyətini yetirdi və böyük öndərimiz öz məğrur səsi ilə “Mən ömrümün qalan hissəsini də xalqıma bağışlayıram” - deyərək, çox çətin bir yükü öz çiyninə götürdü. Onun Azərbaycana olan hədsiz sevgisi və məhəbbəti təlatümlü, kəşməkəşli bir dövrü yaşayan xalqımızı, ölkəmizi yaranmış real təhlükədən, vətəndaş müharibəsindən, anarxiyadan, terrordan qurtardı və yeni müstəqil Azərbaycan dövlətinin quruculuğuna başlandı. Qarşıda duran təxirəsalınmaz məsələlər isə qısa müddətdə - təqribən iki il ərzində həyata keçirilən kəsərli tədbirlər sayəsində öz həllini tapdı.

Respublikada kriminogen durum yenidən hüquq mühafizə orqanlarının nəzarəti altına keçdi, yüzlərlə silahlı cinayətkar dəstə ifşa olundu. Gənc dövlətimizin konstitusiya quruluşunun əsasları və təhlükəsizliyi əleyhinə cinayətləri hazırlayanlar və həyata keçirənlər, terrorçular, vətəndaşlara qarşı sui-qəsd törədənlər, soyğunçuluqla, quldurluqla, adam oğurluğu ilə məşğul olanlar tutularaq məsuliyyətə cəlb edildi.

Ölkənin inkişafı ilə və ardıcıl olaraq əldə edilən uğurlarla barışmaq istəməyən qüvvələrin xəyanətkar niyyətlərini həyata keçirmək üçün əl atdıqları hər cür avantüraların, cinayətlərin, terror aktlarının və dövlət çevrilişi cəhdlərinin qarşısı dahi öndərin rəhbərliyi ilə qətiyyətlə alındı.

Sonrakı dövrlərdə iqtisadiyyatımızda, mədəniyyətimizdə, ordu quruculuğunda, habelə cinayətkarlığa qarşı mübarizədə ilbəil artan nailiyyətlərin şahidi olduq. Heydər Əliyevin simasında Azərbaycan xalqının dövlətə, dövlətçiliyə inamı yarandı və möhkəmləndi. Müstəqil Azərbaycanımıza rəhbərlik etməyə başladığı ilk günlərdən hüquqi, demokratik, suveren dövlət quruculuğu xəttini qarşısına məqsəd qoyan, demokratik dəyərlərə, insanların hüquq və azadlıqlarının təmin edilməsinə sadiq qalacağını bəyan edən əbədiyaşar Prezidentimiz Heydər Əliyev bu mövqeyindən dönmədi. Onun hər bir çıxışı, hər bir sözü konkret işlərlə həyatda öz təsdiqini tapdı və bu gün də tapmaqdadır.

Cənab Prezident!

Bir faktı da demək istərdim ki, bugünkü hakimiyyətə qara yaxanların respublikaya rəhbərlik etdiyi dövrdə təkcə bir il ərzində 7 mindən çox cinayət bağlı qalmışdı. İndi isə bu rəqəm 7,5 dəfə azalıbdır. 2004-cü ildə cəmi 940 cinayət bağlı qalmışdır.

Heydər Əliyevin dövlətçilik, müstəqillik, qanunçuluq, demokratik dəyərlərə sarsılmaz bağlılıq, ictimai-siyasi sabitlik və ölkə iqtisadiyyatının intensiv inkişafı siyasətini zati-alinizin uğurla davam etdirməsi sayəsində indi respublikada kriminogen duruma tam nəzarət olunur.

Sıx qarşılıqlı əlaqədə fəaliyyət göstərən hüquq mühafizə orqanları beynəlxalq terrorçuluqla, ekstremizmlə, separatçılıqla, mütəşəkkil cinayətkarlığın müxtəlif növləri, o cümlədən silahların, narkotik vasitələrin qanunsuz dövriyyəsi, insan alveri, qeyri-leqal miqrasiya ilə mübarizə sahəsində səmərəli struktur islahatlarını, idarəçilik, praktik və xüsusi tədbirləri əhatə edən kompleks işlər görürlər.

Son on ildən artıq bir müddətdə əllərdə qanunsuz saxlanılan və əksəriyyəti avtomat silah olan 32 mindən çox odlu silah yığılmış və silahla törədilən cinayətlərin sayı hazırda on dəfədən çox azalmışdır. Həmin dövrdə ölkə əhalisinin sayının bir milyon nəfərdən çox artmasına baxmayaraq, cinayətkarlığın dinamikasında müsbət meyillər, o cümlədən onların sayının əhəmiyyətli dərəcədə azalması davam etmişdir.

1992-ci illə müqayisədə ötən il cinayətlərin sayı bütövlükdə 25,1 faiz, qəsdən adamöldürmə 2,8 dəfə, quldurluq və soyğunçuluq 3,8 dəfə, oğurluq 4,7 dəfə azalmışdır. Göstərilən illər ərzində tərkibində 39 minə yaxın cinayətkarı birləşdirən 17 minədək cinayətkar qrup və dəstə zərərsizləşdirilmiş, axtarışda olan 55308 nəfər tutularaq cinayət məsuliyyətinə cəlb edilmişdir. 1993-cü illə müqayisədə təqsirləndirilən şəxslərin axtarışı üzrə göstəricilər də yaxşılaşaraq, 62 faizdən 74 faizə qədər yüksəlmişdir. Təkcə 2000-2005-ci illərdə qəsdən adamöldürmə, quldurluq, soyğunçuluq və adam oğurluğu törətmiş 863 cinayətkar qrup və dəstə ifşa olunmuşdur. Bütövlükdə isə həmin dövrdə müxtəlif cinayətlərə görə 77651, o cümlədən qəsdən adamöldürməyə görə 1762, quldurluğa görə 816, soyğunçuluğa görə 772 nəfər cinayət məsuliyyətinə cəlb edilmişdir. Həmçinin, 37 adam oğurluğu üzrə 49 nəfərdən ibarət 13 cinayətkar dəstə, habelə 240 hədə-qorxu ilə tələbetmə faktları üzrə özündə 84 nəfəri birləşdirən 27 cinayətkar qrup zərərsizləşdirilmişdir. Qanunsuz dövriyyədən 3 tondan çox narkotik vasitə götürülmüş, təxminən 3,5 min tona yaxın narkotik tərkibli bitki yığılaraq yaşıl kütlə şəklində məhv edilmişdir.

Bu müddət ərzində müxtəlif cinayətlər törədilməsində təqsirli bilinərək, istintaq orqanları və məhkəmələr tərəfindən dövlətlərarası və beynəlxalq axtarışa verilən 3000-dən çox cinayətkar ölkənin hüdudlarından kənarda müəyyən edilmiş, Azərbaycana gətirilib ədalət məhkəməsinə verilmişdir.

Daxili işlər orqanlarının fəaliyyətinin istiqamətini cinayətlərin profilaktikası və açılması, onları törədən şəxslərin məsuliyyətə cəlb olunması, axtarışı, mülkiyyətin hər bir formasının hüquqazidd əməllərdən qorunması təşkil edir. Bu baxımdan fəaliyyətimizin əsas istiqamətlərindən birini təşkil edən beynəlxalq əməkdaşlıq əlaqələrinin səmərəli qurulmasına da xüsusi diqqət yetiririk. Bu sahədə Daxili İşlər Nazirliyi çoxtərəfli, regional və ikitərəfli səviyyələrdə səmərəli fəaliyyət göstərmişdir.

Son on ildə cinayətlərin açılma faizi də yüksək olmuşdur. Cənab Prezident, bayaq Siz çox haqlı qeyd etdiniz ki, hər 100 min nəfərin sayına düşən cinayətlərin sayına görə, MDB məkanında Azərbaycan yaxşı mənada ən axırıncı yerlərdən birini tutur.

Möhtərəm Prezident!

İşimizin uğurlu getməsində başlıca amillərdən olan əməkdaşlarımızın peşəkarlığının artırılması məsələsi də daim diqqət mərkəzində saxlanılır. Qabaqcıl təcrübənin daha səmərəli tətbiqi məqsədi ilə, daxili işlər orqanlarının əməkdaşları dəfələrlə Birləşmiş Millətlər Təşkilatı, Avropa Şurası, ATƏT və digər beynəlxalq təşkilatlar tərəfindən polisin fəaliyyətinin başlıca istiqamətləri üzrə təşkil edilən müxtəlif forum və müşavirələrdə iştirak etmişlər. İndiki dövrdə, cəmiyyətimizin ayrılmaz tərkib hissəsi olan yeni, müasir tələblərə tam cavab verə bilən polis əməkdaşının formalaşdırılmasına da böyük əhəmiyyət veririk. Bununla yanaşı, daxili işlər orqanlarının əməkdaşları Amerika Birləşmiş Ştatlarına, Avropa dövlətlərinə təlimlər keçməyə göndərilir, öz ölkəmizdə seminarlar, treninqlər təşkil edilir. Hazırda 100-ə yaxın əməkdaşımız Rusiya Federasiyasında, Türkiyədə, Ukraynada təhsil alır. Görülən tədbirlər sayəsində orta və böyük rəis heyəti vəzifələrində xidmət edən ali təhsilli əməkdaşların xüsusi çəkisi 1994-cü illə müqayisədə 58,3 faizdən 79,9 faizə, o cümlədən onların tərkibində hüquqşünasların xüsusi çəkisi 33,3 faizdən 64 faizə yüksəlmişdir.

Daxili İşlər Nazirliyi öz fəaliyyətində gənc əməkdaşların təlim-tərbiyəsinə də geniş yer ayırır, onların xidmət üzrə irəli çəkilməsinə xüsusi diqqət yetirir. İndi daxili işlər orqanlarının sıravi heyətinin demək olar ki, 50 faizə qədəri, zabit heyətinin isə 25 faizdən çoxunu məhz gənclər təşkil edir.

Biz yaxşı başa düşürük ki, hakimiyyət nümayəndəsi olan polisin özünün dünyagörüşü, intellektual səviyyəsi, qanunlara münasibəti, davranışı və şəxsi intizamı ilə başqalarına nümunə olması, dövlətə və onun idarəetmə orqanlarına etimadın möhkəmləndirilməsində başlıca rol oynayır.

O da məlumdur ki, daxili işlər orqanları əməkdaşlarının, nazirliyin rəhbər heyətinin, həmçinin cənab Prezident, bir nazir kimi mənim də fəaliyyətimdə nöqsan və qüsurlar mövcuddur və çox haqlı olaraq Siz bunu burada qeyd etdiniz. Biz bu nöqsan və qüsurları görürük və Sizə söz verirəm ki, onların aradan qaldırılması üçün lazımi tədbirləri görəcəyik.

Cənab Prezident!

2000-2005-ci illər ərzində qanun pozuntularına görə 2 mindən yuxarı əməkdaş, o cümlədən insan hüquq və azadlıqlarını pozduqlarına görə 514 əməkdaş intizam qaydasında cəzalandırılmış, 1338 nəfər isə daxili işlər orqanlarında xidmətdən xaric olunmuşdur.

Möhtərəm cənab Prezident!

Sizə bir daha böyük təşəkkür və minnətdarlığımızı bildiririk ki, bizi qəbul etdiniz. Sizin nitqinizi daxili işlər orqanları, biz gələcək fəaliyyətimiz üçün proqram kimi qəbul edirik. Sizi əmin edirəm ki, burada verdiyiniz tövsiyələr, göstərişlər Daxili İşlər Nazirliyində, ona tabe olan bütün yerli qurumlarda tam məsuliyyəti ilə yüksək səviyyədə icra olunacaqdır.

Möhtərəm cənab Prezident!

Siz həm də, tövsiyə etdiniz ki, bizim xalqla əlaqəmiz yaxşılaşsın, vətəndaşlara daha yaxşı xidmət edək, onlarla əlaqəni daha da genişləndirək. Bizim tərəfimizdən bu sahədə nə lazımdırsa, ediləcəkdir. Daxili işlər orqanlarının bütün şəxsi heyəti adından Sizi əmin edirəm ki, Azərbaycan polisi bundan sonra da ölkəmizdə ictimai-siyasi sabitliyin qorunması, əmin-amanlığın nümunəvi təşkili üçün nə lazımdırsa edəcək, öz Prezidenti ətrafında daha sıx birləşəcəkdir. Diqqətinizə görə sağ olun.

X X X

İLHAM ƏLİYEV: İndi də mükafatların təqdimolunma mərasiminə keçək. Mən dünən bu barədə Sərəncam imzaladım. Bir qrup əməkdaş təltif olundu. İndi ordenlər burada təqdim olunacaq, medalları isə siz özünüz təqdim edərsiniz.

X X X

Sonra dövlətimizin başçısı İlham Əliyev 2005-ci il 30 iyun tarixli Sərəncamı ilə təltif etdiyi polis əməkdaşlarına “Şöhrət” və “Azərbaycan bayrağı” ordenlərini təqdim etdi.

X X X

Azərbaycan Prezidenti İLHAM ƏLİYEV görüşə yekun vuraraq dedi:

-Sağ olun. Sizi bir daha təbrik edirəm. Sabah sizin peşə bayramınızdır. Çox gözəl bayramdır. Mən sizə bir daha uğurlar, cansağlığı arzulayıram. Arzu edirəm ki, bundan sonra da doğma Vətənimizə ləyaqətlə xidmət edəsiniz. Azərbaycanın müstəqilliyinin möhkəmlənməsi işində iştirak edəsiniz. Azərbaycanda bu gözəl vəziyyəti daha da möhkəmləndirmək üçün, bu gözəl ab-havanı əbədi etmək üçün əlinizdən gələni edəsiniz.

Mən şübhə etmirəm ki, ölkəmiz daha da güclənəcək, Azərbaycanda insanlar rahat şəraitdə, sülh şəraitində yaşayacaqlar. Asayiş qorunacaq, sabitlik möhkəm olacaq və bilirsiniz ki, bu işdə polisin üzərinə xüsusi bir vəzifə düşür. Bu vaxta qədər siz bu vəzifəni ləyaqətlə icra etmisiniz. Arzu edirəm ki, bundan sonra da doğma vətənimizə öz xidmətlərinizi göstərəsiniz. Qarşıdan gələn bayram münasibətilə sizi bir daha təbrik edir, sizə uğurlar arzulayıram.

Sağ olun.