Nazirliyin mətbuat xidmətinin rəhbəri Sadiq Gözəlov konfransı açaraq, cinayətkarlığa qarşı mübarizədə əsası ümummilli liderimiz Heydər Əliyev tərəfindən qoyulmuş və Prezident İlham Əliyev tərəfindən davam etdirilən siyasətin Azərbaycanın hüquq mühafizə, o cümlədən daxili işlər orqanları tərəfindən uğurla aparıldığını, son illər bu sahədə qazanılan nailiyyətləri və ölkəmizdə sabitliyin dönməzliyinin təmin olunduğunu diqqətə çatdırdı.

Bugünkü konfransın məqsədinin jurnalistlərlə görüşərək, onları narahat edən sualları cavablandırmaq, ölkəmizdə cinayətkarlığa qarşı mübarizənin vəziyyəti, ictimai asayişin, daxili sabitliyin qorunması və kriminogen durum haqqında ətraflı məlumat vermək olduğunu bildirən daxili işlər naziri Ramil Usubov Azərbaycan Prezidenti İlham Əliyev tərəfindən bu il iyunun 30-da imzalanmış altı sərəncam və üç fərmanın əhəmiyyətini xüsusi vurğuladı, yaxın gələcəkdə polisin fəaliyyətində ciddi dönüş yaradacaq “Polisin fəaliyyətinin təkmilləşdirilməsi haqqında” təsdiq olunan Proqramda Azərbaycan polisinin vətəndaşlarla, mətbuat nümayəndələri ilə əlaqələrinin genişləndirilməsi məsələsinin qoyulduğunu bildirdi.

Nazir xatırlatdı ki, dövlət müstəqilliyini qazanandan sonra Azərbaycanın çox böyük problemləri, o cümlədən Ermənistanın Azərbaycana ərazi iddiası ilə etdiyi təcavüz, onun ağır nəticələri, o zamankı iqtidarın səriştəsizliyi, müxtəlif partiyaların hakimiyyət uğrunda apardıqları qeyri-konstitusion mübarizə və bunun ağır nəticələri ölkəmizin o vaxtkı kriminogen vəziyyətinə böyük mənfi təsir göstərmişdi. 1992-1993-cü illər Azərbaycanda kriminogen durumun ən gərgin illəri sayılır. Həmin dövrdə 26 minə qədər cinayət hadisəsi baş vermişdi.

Ramil Usubov bildirdi ki, yalnız ümummilli liderimiz Heydər Əliyevin ikinci dəfə hakimiyyətə qayıtmasından sonra, 1993-cü ilin sonundan başlayaraq iki il ərzində ölkədə kriminogen durum tamamilə nəzarət altına alındı. Heydər Əliyevin rəhbərliyi altında aparılan uğurlu islahatlar, hüquq mühafizə orqanlarının əlbir işinin təşkili sayəsində 1996-cı ilin sonlarından ölkəmizdə sabitlik bərqərar oldu. Ötən illər ərzində bu sabitlik qorunub saxlanmış, cinayətkarlığın ümumi səviyyəsi ilbəil aşağı düşmüşdür. Son 10 il ərzində Azərbaycanda cinayətkarlığa qarşı mübarizənin nəticələri, həqiqətən, sevindiricidir. Bu müddətdə ümumi cinayətlər 30,9 faiz, hər 100 min nəfərə düşən cinayətlər 36,8 faiz azalmış, ağır cinayətlər 1992-1993-cü illə müqayisədə 3,6 dəfə aşağı düşmüşdür. Ayrı-ayrı cinayət növlərinin azalması bu illər sürətlə getmişdir. Belə ki, oğurluq hadisələri 5,2 dəfə, nəqliyyat vasitələrinin oğurlanması, yəni qaçırılması faktları 24 dəfədən çox azalmışdır. Bundan əlavə, görülmüş tədbirlər, respublikanın hüquq mühafizə orqanlarının apardığı fəaliyyət nəticəsində əhalidən 25 mindən çox qeyri-qanuni silah toplanmış və nəticədə son on ildə odlu silahla törədilən cinayətlərin sayı 5 dəfədən çox azalmışdır. Bütün bu göstəricilər onu deməyə əsas verir ki, son on ildə Azərbaycan xalqının ümummilli lideri Heydər Əliyevin başçılığı ilə aparılan siyasət cinayətkarlığa qarşı mübarizə sahəsində də öz müsbət nəticəsini vermişdir. Bu gün bu siyasəti ardıcıllıqla, uğurla davam etdirən Prezident İlham Əliyev ölkəmizdə sabitliyin, daxili əmin-amanlığın, ictimai asayişin qorunmasına çox böyük diqqət yetirir və hüquq mühafizə orqanlarının rəhbərlərindən, onlara tabe olan bütün qurumlardan bu istiqamətdə fəaliyyətin daha da gücləndirilməsini tələb edir.

Nazirliyə tabe olan bütün qurumların əmin-amanlığın təmin olunması, asayişin yüksək səviyyədə qorunması, vətəndaşlarımızın rahatlığı üçün əllərindən gələn bütün işləri gördüyünü diqqətə çatdıran Ramil Usubov ictimaiyyətlə, vətəndaşlarla polis arasında yaranmış əlaqəni yüksək qiymətləndirdi, kriminogen durumun daha da normallaşmasında əməyi olanlara dərin minnətdarlığını bildirdi. O, son 6-7 ildə MDB məkanında hər 100 min nəfərə düşən cinayətlərin sayına görə Azərbaycanın yaxşı mənada sonuncu yerlərdən birini tutduğunu xüsusi vurğuladı.

DİN-də aparılan böyük struktur dəyişkliyinə, islahatlara toxunan, son on ildə nazirliyin sistemində müasir tələblərə cavab verən yeni qurumlar – mətbuat xidməti, şəxsi heyətlə iş, mütəşəkkil cinayətkarlığa qarşı mübarizə, daxili təhqiqat, daxili təhlükəsizlik, insan alverinə qarşı mübarizə idarələrinin yaradıldığını xatırladan nazir daxili işlər orqanlarının fəaliyyətini tənzimləyən “Polis haqqında”, “Əməliyyat-axtarış fəaliyyəti haqqında”, “Polisdə xidmətkeçmə haqqında” qanunların və digər sənədlərin qəbul olunduğunu bildirərək dedi ki, həmin sənədlər Avropa ölkələrinin yüksək ixtisaslı ekspertlərinin rəyindən sonra parlamentdə qəbul edilmişdir və indi Azərbaycan polisi bu qanunlar çərçivəsində fəaliyyət göstərir.

Ramil Usubov daxili işlər orqanları əməkdaşlarının fəaliyyətində insan haqlarına, insan hüquqlarının qorunmasına xüsusi diqqət yetirildiyini, son beş ildə Avropanın müxtəlif dövlətlərindən bu sahədə böyük təcrübəsi olan mütəxəssislərin Azərbaycana dəvət olunduğunu, onların müvafiq qurumların rəhbərləri ilə keçirdikləri treninqlərin, müxtəlif məşğələlərin, fikir mübadiləsinin əhəmiyyətini vurğuladı. Həmçinin bildirdi ki, Bakı Ali Polis Akademiyasında insan hüquqlarına dair xüsusi kurs açılmışdır, nazirlik sistemində təhsil, peşə hazırlığı ilə bağlı keçirilən bütün dərslərdə şəxsi heyətə məhz insan hüquqlarının qorunması, polisin fəaliyyətində vətəndaşların hüquq və azadlıqlarının gözlənilməsi mövzuları ətraflı öyrədilir. Bu işlərin nəticəsidir ki, son beş ildə şəxsi heyət arasında vətəndaşlara qarşı kobudluq göstərdiklərinə, onları qanunsuz olaraq polisə gətirdiklərinə, digər vətəndaşlara qarşı edilən qanun pozuntularına görə cəzalandırılanların sayı 3 dəfədən çox azalmışdır. Son üç ildə bu cür qanun pozuntusuna yol verən 204 əməkdaş müəyyən edilib və cəzalandırılmışdır. Bunlardan 6-sı cinayət məsuliyyətinə cəlb olunmuş, 30-u daxili işlər orqanlarından qovulmuş, 11-nin rütbəsi aşağı salınmış və qalanları haqqında digər intizam tədbirləri görülmüşdür. Bütün bunlar onu göstərir ki, Azərbaycan dövləti, bugünkü hakimiyyət vətəndaşa qarşı törədilən hər bir haqsızlığa qarşı ciddi tədbirlər görür və görəcəkdir.

Sonra nazir Ramil Usubov jurnalistləri maraqlandıran suallara ətraflı cavab verdi.