Dəmiryolçular 20 Yanvar şəhidlərinin xatirəsini ehtiramla anmışlar
Bakı, 18 yanvar (AZƏRTAC). “Azərbaycan Dəmir Yolları” Qapalı Səhmdar Cəmiyyətində (QSC) 20 Yanvar faciəsinin 24-cü ildönümü ilə əlaqədar şəhidlərin xatirəsini anma mərasimi keçirilmişdir.
QSC-nin mətbuat xidmətindən AZƏRTAC-a bildirmişlər ki, əvvəlcə şəhidlərin xatirəsi bir dəqiqəlik sükutla yad edilmişdir.
“Azərbaycan Dəmir Yolları” QSC-nin kadrlar şöbəsinin rəisi, Yeni Azərbaycan Partiyası ərazi ilk partiya təşkilatının sədri Xeyrulla Hümbətov tədbiri açaraq bildirmişdir ki, xalqımızın tarixinə qanlı və şanlı səhifə kimi yazılan 20 Yanvar faciəsinin 24-cü ildönümü dövlət səviyyəsində ölkəmizin hər yerində qeyd olunur. Diqqətə çatdırılmışdır ki, 1990-cı il yanvarın 19-dan 20-nə keçən gecə sovet qoşunları müstəqillik arzusu ilə ayağa qalxmış xalqımıza qarşı vəhşilik törətmişlər. Bu dəhşətli hadisədə yüzlərlə insan qətlə yetirilmiş, yaralanmış, qanunsuz həbs edilmişdir.
Bildirilmişdir ki, Bakı küçələrinin qana bələnmiş o ağır günlərdə faciənin səbəb və mahiyyətini daha dərindən başa düşüb mənsub olduğu xalqın kədərinə şərik çıxan, onu tək qoymayan ulu öndər Heydər Əliyev yanvarın 21-də Azərbaycanın Moskvadakı nümayəndəliyinə gələrək mətbuat konfransı keçirmiş, 20 Yanvar faicəsini törədənləri kəskin lənətləyərək, azərbaycanlıların etiraz səsini dünyaya çatdırmışdır.
Həmin günün tarixi əhəmiyyəti həm də ondan ibarətdir ki, sovet rejimi bu qanlı cinayəti törətməklə xalqla özü arasında olan bütün körpüləri yandırdı. Artıq hər kəs həmin ordunun ona düşmən olduğunu anladı, daxilən sarsıldı, törədilən cinayətləri nə özünə, nə də ətrafdakılara izah edə, bu rejimə haqq qazandıra bilmədi. Bütün Azərbaycan cəmiyyəti sovet imperiyasının aşkar iflasını tam çılpaqlığı ilə dərk etdi.
X.Hümbətov qeyd etmişdir ki, 1990-cı il yanvarın 20-də öz azadlığı və istiqlaliyyəti uğrunda mübarizəyə qalxmış insanlar arasında dəmiryolçular da az olmamışdır. Həmin faciəli gecədə yüzlərlə ölən və yaralananlar arasında 11 dəmiryolçu və onların ailə üzvləri də olmuşdur. QSC-nin rəhbərliyi hər il onlara maddi və mənəvi dəstək göstərir.
Mərasimdə çıxış edənlər 20 Yanvar faciəsinin baş vermə səbəbi, tarixdəki rolu haqqında danışmış, həmin dəhşətli gecədə şəhid olan soydaşlarımıza Allahdan rəhmət diləmişlər.
Bölmənin digər xəbərləri
