DGK sədri: Orta Dəhliz boyunca infrastruktur imkanlarının genişləndirilməsi istiqamətində layihələr icra olunur
Bakı, 8 may, AZƏRTAC
Orta Dəhliz üzrə yükdaşımaların həcminin artması Azərbaycanın gömrük sisteminin fəaliyyətində yeni prioritetlərin formalaşmasına səbəb olur. Qitələrarası daşımalar baxımından strateji əhəmiyyətə malik olan bu marşrut üzrə yük axınının genişlənməsi rəqəmsal həllərin və müasir idarəetmə mexanizmlərinin tətbiqini zəruri edir.
AZƏRTAC xəbər verir ki, bu fikirləri Dövlət Gömrük Komitəsinin sədri Şahin Bağırov bildirib.
Komitə sədri deyib ki, statistik göstəricilər Orta Dəhlizin beynəlxalq yükdaşımalar üçün əhəmiyyətinin sürətlə artdığını göstərir. Onun sözlərinə görə, həm coğrafi mövqe, həm də yaradılmış müasir nəqliyyat infrastrukturu bu marşruta marağı artırır və yük axınının daha da genişlənməsinə şərait yaradır.
Ş.Bağırov qeyd edib ki, artan yük həcmlərinin operativ və səmərəli şəkildə idarə olunması üçün Dövlət Gömrük Komitəsi tərəfindən rəqəmsal və innovativ həllərin tətbiqi əsas prioritet istiqamətlərdən biridir.
“Elektron gömrük sistemləri və risk idarəetmə mexanizmləri vasitəsilə həm qanuni ticarətin sürətləndirilməsi, həm də mümkün pozuntuların vaxtında aşkarlanması təmin edilir. Məqsəd yükdaşımaların çevik və şəffaf şəkildə həyata keçirilməsinə şərait yaratmaqdır”, – deyə komitə sədri vurğulayıb.
Onun sözlərinə görə, risk idarəetmə sistemləri vasitəsilə qanuni ticarət iştirakçıları üçün daha əlverişli şərait yaradılır, eyni zamanda, mümkün hüquqpozmalara qarşı nəzarət tədbirləri daha dəqiq və operativ şəkildə həyata keçirilir.
Ş.Bağırov bildirib ki, Orta Dəhliz boyunca infrastruktur imkanlarının genişləndirilməsi istiqamətində də mühüm layihələr icra olunur: “Keçid məntəqələrinin modernləşdirilməsi, logistika imkanlarının artırılması və gömrük prosedurlarının optimallaşdırılması yükdaşımaların sürətinin və səmərəliliyinin yüksəlməsinə xidmət edir”.
Komitə sədri multimodal daşımaların əhəmiyyətinin artdığını da diqqətə çatdırıb. O qeyd edib ki, müxtəlif nəqliyyat növlərinin inteqrasiyası beynəlxalq ticarət əlaqələrinin genişlənməsində və tranzit imkanlarının artırılmasında mühüm rol oynayır.
Bölmənin digər xəbərləri
