DMX Azərbaycanda olan, yaşayan əcnəbilərə və vətəndaşlığı olmayan şəxslərə müraciət edib
Bakı, 18 iyul, AZƏRTAC
Dövlət Miqrasiya Xidməti (DMX) Azərbaycanda olan və yaşayan əcnəbilərə, vətəndaşlığı olmayan şəxslərə növbəti dəfə müraciət edib.
DMX-dən AZƏRTAC-a bildiriblər ki, müraciətdə Azərbaycan Respublikası Nazirlər Kabinetinin 2020-ci il 17 iyul tarixli qərarı ilə sərtləşdirilmiş xüsusi karantin rejiminin müddətinin 2020-ci il avqustun 5-i saat 06:00-dək uzadıldığı qeyd olunub. Diqqətə çatdırılıb ki, bu rejim Bakı, Sumqayıt, Gəncə, Yevlax, Masallı, Cəlilabad, Mingəçevir şəhərlərini və Abşeron, Bərdə, Siyəzən, Şəki, Xaçmaz, Goranboy, Göygöl rayonlarını əhatə edir. Bu müddətdə Dövlət Miqrasiya Xidmətinin fəaliyyəti, eləcə də olduğu yeri və ya yaşayış yerini müvəqqəti tərk etmək istəyən əcnəbilərin icazəsi iyunun 21-dən etibarən tətbiq edilmiş qaydalar əsasında həyata keçiriləcək. Daha ətraflı bu linkdən tanış olmaq olar. https://migration.gov.az/press/news_content/14090.
Həmçinin olduğu yer və ya yaşayış yerini tərk etmək üçün verilən icazə müddətinin iki saatdan üç saatadək artırılmasını nəzərə alaraq, müvəqqəti və daimi yaşama icazələrinə müraciət edilməsi zamanı qanunvericiliklə tələb olunan bütün sənədlərin (müvafiq tibbi arayışlar da daxil olmaqla) təqdim edilməsi zəruridir.
Ətraflı məlumat üçün (012) 919 - Çağrı Mərkəzinə zəng etmək xahiş olunur.
Bölmənin digər xəbərləri
