Donald Tramp Ukraynanın yeni prezidentini Vaşinqtona səfərə dəvət edib
Bakı, 1 iyun, AZƏRTAC
Ukrayna Prezidenti Vladimir Zelenski ABŞ lideri Donald Tramp tərəfindən Vaşinqtona rəsmi səfərə dəvət edilib.
AZƏRTAC Ukraynanın “Zerkalo nedeli” nəşrinə istinadla xəbər verir ki, Vladimir Zelenski dəvəti mayın 31-də alıb. Səfər isə Donald Tramp və Rusiya prezidenti Vladimir Putin arasında görüşdən sonra baş tuta bilər.
“Görüş zamanı Donbasda münaqişənin nizamlanması, həmçinin real biznes-layihələr barədə müzakirələr aparılacaq”, - nəşr öz mənbələrinə istinadla belə yazır.
Bir qədər əvvəl Donald Trampın Rusiyalı həmkarı ilə “Böyük iyirmilik” ölkələrinin iyun ayında Yaponiyada keçiriləcək sammitində görüşmək niyyətində olduğu barədə məlumat yayılıb.
ABŞ-ın Ukrayna məsələləri üzrə nümayəndəsi Kurt Volker Vladimir Zelenski ilə danışıqların Ağ evin gündəliyində olduğunu, lakin onun hansı formatda keçiriləcəyinin məlum olmadığını bildirib.
Bölmənin digər xəbərləri
