Dövlət Dəniz Agentliyində 20 Yanvar faciəsi ilə bağlı anım mərasimi keçirilib
Bakı, 19 yanvar, AZƏRTAC
Azərbaycan Respublikasının Dövlət Dəniz Agentliyində 20 Yanvar faciəsinin 28-ci ildönümü ilə bağlı anım mərasimi keçirilib.
Dövlət Dəniz Agentliyinin mətbuat xidmətindən AZƏRTAC-a bildirilib ki, şəhidlərin ruhu bir dəqiqəlik sükutla yad olunduqdan sonra tədbir iştirakçıları tarixi günlə bağlı fikirlərini bölüşüblər.
Qeyd olunub ki, müdhiş 20 Yanvar günü Azərbaycanın çağdaş tarixində müstəqillik yolunda cəsarətli, ən dəyərli səhifələrdən biri sayılır. Azərbaycanın müstəqilliyi və suverenliyi, torpaqlarımızın bütövlüyü uğrunda qətiyyətlə ayağa qalxan əliyalın xalqımız təpədən dırnağa qədər silahlanmış imperiya qoşunlarının qarşısında əyilməyib, sınmayıb. Mərd və igid insanlarımız ölümü əsarətdən və zülmdən üstün tutmaqla, şərəfli şəhidlik zirvəsinə yüksələrək həm özlərinə, həm də Vətənə qəhrəmanlıq salnaməsi yaradıblar.
Bakıya qoşunların qanunsuz yeridilməsi nəticəsində paytaxtda və respublikanın rayonlarında 147 nəfər qətlə yetirilib, 744 nəfər yaralanıb, 841 nəfər qanunsuz həbs olunub. Bu faciə Azərbaycan xalqını qorxutmaq, onun milli oyanışını, torpaq uğrunda mübarizliyini məhv etmək məqsədi daşıyan mənfur planın tərkib hissəsi olub. Xalqımız həmin gün üstünə şığıyan tanklara, avtomat və pulemyot güllələrinə qarşı sinəsini verməyi, öz mənliyini və mətinliyini nümayiş etdirməyi bacarıb. O ağır günlərdə xalqımızın ümummilli lideri Heydər Əliyev özünün və ailə üzvlərinin həyatını təhlükədə qoyaraq yanvarın 21-də Azərbaycanın Moskvadakı daimi nümayəndəliyinə gəlib terror aktını qətiyyətlə lənətləyib.
Ulu Öndərin yenidən siyasi hakimiyyətə qayıdışından sonra 20 Yanvar faciəsinin səbəblərinin araşdırılması və onu törədənlərin məsuliyyətə cəlb olunması istiqamətində mühüm addımlar atılıb, bu qanlı faciəyə dövlət səviyyəsində hüquqi-siyasi qiymət verilib. Prezident İlham Əliyev bütün şəhid ailələrinin, o cümlədən 20 Yanvar şəhid ailələrinin problemlərinin həlli istiqamətində məqsədyönlü tədbirlər həyata keçirir. Şəhid ailələrinin rifahının, həyat şəraitinin yaxşılaşdırılması yönündə vacib addımlar atılır.
Azərbaycan Respublikasının Birinci vitse-prezidenti Mehriban xanım Əliyevanın milli-mənəvi dəyərlərimizin, qan yaddaşımızın qorunub saxlanılması və dünyada tanıdılmasına böyük diqqət yetirdiyini qeyd edən tədbir iştirakçıları vurğulayıblar ki, Mehriban xanım Əliyeva 20 Yanvar şəhidlərinin xatirəsinin əbədiləşdirilməsi və şəhid ailələrinin problemlərinin həllinin diqqətdə saxlanılması, 20 Yanvar hadisələri zamanı sağlamlığın itirən şəxslərin sosial müdafiəsinin gücləndirilməsi, onların sağlamlıqlarının bərpası istiqamətində mühüm işlər görülməsini diqqətdə saxlayır.
Tədbirdə çıxış edənlər bildiriblər ki, 1990-cı il yanvarın 20-də sovet hərbi gəmilərinin hərəkətinə yol verməmək üçün 102 iri və onlarla xırda gəmi, Bakı buxtasına gedən yolun qarşısını kəsib. Bütün xəbərdarlıqlara və hədələrə baxmayaraq geri çəkilməyiblər. O zaman blokadada olan, xarici ölkələrlə əlaqəsi kəsilən və heç bir yerdən kömək ala bilməyən gəmi kapitanları, özləri hərəkətə keçiblər. Onlar “Dəniz vağzalı”na gələrək “Sabit Orucov” adlı gəmidə ştab yaradaraq, 7 nəfər kapitanla birlikdə Kapitanlar Şurasını seçib, yekdilliklə SOS siqnalı vermək qərarına gəliblər. Mətin Azərbaycan, rus və ingilis dillərində yayımlanıb. Bunun sayəsində bütün dünyaya Bakıda baş verən qanlı hadisə ilə bağlı məlumat yayılıb.
Həmin gün bütün dənizçilər düşmənə qarşı birləşiblər. Kapitanlar tabeliklərində olan irili-xırdalı gəmiləri Bakı buxtasına yönəldib. Çətin vəziyyətə düşsələr də, ümidlərini kəsməyərək, hər tərəfə məlumat ötürüblər. Xarici dövlətlərin mətbuatları ancaq TASS Teleqraf Agentliyinin verdiyi məlumatları yayıb. Amma Azərbaycandan gedən dolğun məlumatlar, həmin dənizçilərin, həmin xarici gəmilərin qəbul edib yaydığı xəbərlərə istinad edərək, Bakı faciəsini olduğu kimi dünya ictimaiyyətinə çatdıra biliblər.
Dənizçilərin dilində “ölü dəqiqə” deyilən termin var. Hər saatdan bir 3 dəqiqə dünya dənizçiləri yeni məlumat alıb. Yanvarın 20-si səhər saat 11:30-dan 21-nə keçən gecəyədək mütəmadi təkrar olunan SOS siqnalının ilk mətninin əks sədasını dənizçilər Baltik və Aralıq dənizlərindən verilən radioqramlardan alıblar. Eyni zamanda, dənizçilər etiraz olaraq hər yarım saatdan bir həyəcan siqnalı da verib.
Verilən SOS siqnalı sayəsində dünyanın 50-dən çox ölkəsinin dənizçiləri onların harayına səs verib. Bütün radioqramlarda öz həmrəyliklərini və bu faciənin bütün dünyaya çatdırılmasına kömək edəcəklərini bildiriblər. Bu, dünya dənizçilərinin öz həmrəyliklərini bu cür nümayiş etdirdiyi ilk hadisə kimi tarixə düşüb.
Tədbirdə çıxış edənlər Şəhidlərimizə Allahdan rəhmət diləyərək bildiriblər ki, 20 Yanvar hadisəsi Ümummilli Hüzn Günü olması ilə yanaşı, həm də tariximizin şərəfli qəhrəmanlıq səhifələrindəndir.
Bölmənin digər xəbərləri
