Dövlət Gömrük Komitəsinin sədri “Caspian Energy Club”un üzvləri ilə görüşüb
Bakı, 14 iyul, AZƏRTAC
Prezident İlham Əliyevin həyata keçirdiyi uzaqgörən siyasətin, son illər gömrük sistemində aparılan islahatların nəticəsi olaraq gömrük-sərhəd keçid məntəqələrinin buraxılış qabiliyyəti 3 dəfədən çox artıb.
Dövlət Gömrük Komitəsinin (DGK) Mətbuat və İctimaiyyətlə Əlaqələr İdarəsindən AZƏRTAC-a bildirilib ki, bu fikirləri DGK-nın sədri, gömrük xidməti general-polkovniki Səfər Mehdiyev iyulun 14-də Komitə rəhbərliyinin və “Caspian Energy Club”un (CEC) üzvlərinin iştirakı ilə keçirilən biznes forumda səsləndirib. Tədbirdə DGK rəsmiləri, CEC-in sədri və baş icraçı direktoru Telman Əliyev, eləcə də 110-a qədər sahibkar iştirak edib.
CEC-in sədri Telman Əliyev çıxış edərək forumun təşkilində göstərilən dəstəyə görə Klub üzvləri adından Komitəyə təşəkkürünü bildirib. Qeyd olunub ki, DGK ilə CEC arasında səmərəli, işgüzar münasibətlər qurulub və faydalı əməkdaşlıq COVID-19 pandemiyası dövründə də davam etdirilib.
Vurğulanıb ki, qurumlar arasında birgə ikitərəfli İşçi Qrupu fəaliyyət göstərir, bu da gündəlik qarşıya çıxan məsələlərin operativ şəkildə həllinə, gömrük sistemində tətbiq edilən layihələrin, yeniliklərin birgə müzakirə edilərək sahibkarların fikir və rəylərinin öyrənilməsinə imkan yaradır.
Komitə sədri Səfər Mehdiyev artıq ənənə halını alan bu cür tədbirlərin xarici ticarət sahəsində fəaliyyət göstərən bütün maraqlı tərəflərin ehtiyaclarının öyrənilməsinə, problemli məqamların müəyyənləşdirilməsinə və gömrük sisteminin daha da təkmilləşdirilməsi ilə bağlı dayanıqlı həllərin işlənib hazırlanmasına mühüm imkanlar yaratdığını diqqətə çatdırıb.
Prezident İlham Əliyevin rəhbərliyi ilə gömrük sistemində aparılan islahatlardan danışan DGK sədri vurğulayıb ki, dövlətimizin başçısının hərtərəfli diqqət və qayğısı nəticəsində gömrük orqanları qabaqcıl texnologiyalara malik, ixtisaslı kadrlar və müasir infrastrukturla təmin olunan dinamik quruma çevrilib.
İslahatların əsas hədəfinin xarici ticarət iştirakçıları üçün asan, sürətli və şəffaf gömrük sisteminin yaradılması olduğunu qeyd edən Səfər Mehdiyev hərtərəfli dövlət qayğısı nəticəsində hazırda gömrük-sərhəd-keçid məntəqələrində infrastrukturun əsaslı şəkildə yenidən qurulduğunu, ən müasir texniki nəzarət vasitələri ilə təchiz edildiyini bildirib. Nəticədə sərhədkeçmə proseslərinə sərf olunan 2-3 saatlıq müddət 4-5 dəqiqəyə endirilib, gömrük sərhəd-keçid məntəqələrinin buraxılış qabiliyyəti bir istiqamətdə 200 yük nəqliyyat vasitəsindən 700-ə çatdırılıb.
Əlavə edilib ki, hazırda Gürcüstanla sərhəddə yerləşən gömrük-keçid məntəqələri vasitəsilə bir istiqamətdə ümumilikdə 1000-dən artıq nəqliyyat vasitəsinin keçidini təmin etmək mümkündür. Rusiya ilə sərhəddə inşa olunan “Xanoba” gömrük postu fəaliyyətə başladıqdan sonra isə şimal istiqamətində gündəlik 2000-ə qədər nəqliyyat vasitəsinin keçidini təmin etmək mümkün olacaq.
Komitə sədri vurğulayıb ki, sərhədkeçmə prosesində əldə olunan nailiyyətlər beynəlxalq ticarətin asanlaşdırılması ilə yanaşı, xarici ticarət iştirakçıları üçün münbit biznes mühitinin formalaşdırılmasına şərait yaradıb, vaxt və vəsait itkisinin qarşısı alınıb.
Səfər Mehdiyev gömrük orqanlarının fiskal sahədəki fəaliyyətindən bəhs edərək bildirib ki, maliyyə nəzarətinin gücləndirilməsi, uçotun düzgün qurulması, könüllü riayət mədəniyyətinin formalaşdırılması istiqamətində atılan addımlar nəticəsində dövlət büdcəsinə ödənilən vəsaitlərin miqdarında ciddi artım müşahidə olunur. Komitə sədri bu sahədə uğurların əldə edilməsində kölgə iqtisadiyyatının, inhisarçılığın aradan qaldırılması, korrupsiyaya qarşı mübarizə tədbirlərinin də əhəmiyyətli rol oynadığını diqqətə çatdırıb.
Gömrük sistemində tətbiq edilən layihələrdən, innovativ yeniliklərdən danışan Səfər Mehdiyev “Yaşıl dəhliz” buraxılış sisteminin timsalında bu yeniliklərin sahibkar-məmur təmasının minimuma endirilməsinə, ölkəmizin ixrac potensialının artırılmasına, gömrük sistemində şəffaflığın təmin olunmasına şərait yaratdığını söyləyib.
Komitə sədri gömrük orqanlarının daim sahibkarların yanında olduğunu, onların gömrüklə bağlı məsələlərinin operativ qaydada həll edilməsi üçün zəruri addımların atıldığını, eyni zamanda, gömrük işinin səmərəliliyinin artırılmasında sahibkarların rəy və təkliflərinə həssaslıqla yanaşıldığını diqqətə çatdırıb.
Diskussiya şəklində davam edən forumda DGK-nın sədri biznes nümayəndələrinin rəy və təkliflərini dinləyib, onları maraqlandıran sualları cavablandırıb.
Sonda Dövlət Gömrük Komitəsinin sədrinə “Caspian Energy Club”un Fəxri üzvlük sertifikatı təqdim edilib. Eyni zamanda, Klubun üzvlərinə və bir qrup sahibkara səmərəli fəaliyyətlərinə görə “Azərbaycan Respublikası Dövlət Gömrük Komitəsinin 30 illiyi (1992-2022)” Azərbaycan Respublikasının yubiley medalı təqdim olunub.
Bölmənin digər xəbərləri
