Dövlət Komitəsində ötən ilin yekunları və qarşıda duran məsələlər müzakirə olunub
Bakı, 9 fevral, AZƏRTAC
Fevralın 9-da Ailə, Qadın və Uşaq Problemləri üzrə Dövlət Komitəsinin 2022-ci ilin yekunlarına həsr edilmiş kollegiya iclası keçirilib.
AZƏRTAC xəbər verir ki, əvvəlcə Ulu Öndər Heydər Əliyevin, Azərbaycanın ərazi bütövlüyü uğrunda canlarından keçən şəhidlərimizin və Türkiyədə baş vermiş zəlzələ qurbanlarının əziz xatirəsi bir dəqiqəlik sükutla yad edilib.
İclası giriş sözü ilə açan komitə sədri Bahar Muradova 44 günlük Vətən müharibəsindən və pandemiya dövründən danışıb. Bildirib ki, Azərbaycan bütün çətinliklər qarşısında qısa müddətdə özünü toparlayıb və böyük nailiyyətlərə imza atıb. Eyni zamanda, Ailə, Qadın və Uşaq Problemləri üzrə Dövlət Komitəsi də öz üzərinə düşən öhdəlikləri yerinə yetirib. Prezident İlham Əliyev tərəfindən cari ilin “Heydər Əliyev İli” elan edildiyini xatırladan komitə sədri 2023-cü ilin də Azərbaycan üçün uğurlu olacağına əminliyini vurğulayıb.
Sonra Bahar Muradova iclasın gündəliyinə daxil olan 4 məsələni iclas iştirakçılarının diqqətinə çatdırıb. Ailə, Qadın və Uşaq Problemləri üzrə Dövlət Komitəsinin 2022-ci ildəki fəaliyyəti haqqında danışan komitə sədri bildirib ki, hesabat ilində Komitə tərəfindən 6 hesabat və 30-dan çox regionu əhatə edən 7 araşdırma və təhlil həyata keçirilib. B.Muradova, həmçinin normativ hüquqi bazanın təkmilləşdirilməsindən, Komitə tərəfindən rəy və təklif verilmiş qanunvericilik layihələrindən də söz açıb.
Daha sonra Naxçıvan Muxtar Respublikasının AQUPDK-nın sədri Ramilə Seyidova muxtar respublikanın Komitəsinin hesabatını təqdim edib. Hesabat dövrü ərzində qeyri-hökumət təşkilatları ilə bir sıra tədbirlərin görüldüyünü bildirən R.Seyidova qadınların bu tədbirlərdə çox fəal iştirak etdiklərini diqqətə çatdırıb.
Digər çıxış edənlər qadın və gender məsələləri, hüquqi təminat və məişət zorakılığı ilə mübarizə sahəsində həyata keçirilmiş tədbirlər haqqında danışıblar.
İclasda cari ilin “Heydər Əliyev İli” elan edilməsi ilə bağlı tədbirlər planı müzakirə edilib. Bildirilib ki, bu çərçivədə bir çox tədbirlərin həyata keçirilməsi üçün işlər aparılır.
Tədbirdə, həmçinin "Uşaq hüquqları haqqında Konvensiyası”nın icrasına dair Azərbaycan hökumətinin beşinci və altıncı birgə dövri məruzəsinin yekun nəticələri ilə bağlı məlumat da verilib.
Sonda qarşıda duran digər məsələlər barədə fikir mübadiləsi aparılıb.
Bölmənin digər xəbərləri
