DÖVLƏT NEFT ŞİRKƏTİNİN PREZİDENTİ RÖVNƏQ ABDULLAYEVİN ÇIXIŞI
Dövlət Neft Şirkətinin prezidenti RÖVNƏQ ABDULLAYEV 2007-ci ilin birinci rübündə neft-qaz sənayesində əldə olunan uğurlardan bəhs etdi. O, bildirdi ki, indiyə qədər Bakı-Tbilisi-Ceyhan kəməri ilə 103 milyon barrel Azərbaycan nefti dünya bazarına ixrac olunubdur. İlin sonuna qədər isə ölkəmizdə neft hasilatı daha da artacaqdır. Bu dövrdə neft məhsullarının ixracı da artıbdır. Artıq “Şahdəniz”dən qaz hasilatına başlanılıb və həmin qaz ilkin mərhələdə ixrac kəmərinə vurulur.
Dövlət Neft Şirkəti daim öz cari və perspektiv fəaliyyət proqramlarının icrasında ümummilli liderimiz Heydər Əliyevin memarı olduğu neft strategiyasının konsepsiyalarını rəhbər tutur.
Möhtərəm Prezident, Sizin neft sənayesinə göstərdiyiniz gündəlik qayğı və diqqət sahəsində şirkətimizin texniki-iqtisadi göstəriciləri dinamik olaraq yüksəlir. Xarici şirkətlərlə qarşılıqlı surətdə faydalı tərəfdaşlıq çərçivəsində həyata keçirilən beynəlxalq miqyaslı layihələr məntiqi bəhrələrini verir. Ötən 2006-cı il və bu ilin birinci rübü ölkə iqtisadiyyatının digər sahələri kimi, neft sənayesi üçün də uğurlu olmuşdur. Ümummilli lider Heydər Əliyevin neft strategiyasının şah əsəri olan Bakı-Tbilisi-Ceyhan əsas ixrac kəmərində tikinti işlərinin başa çatdırılması və may ayının 28-də “Respublika günü”ndə Azərbaycan neftinin bu kəmərlə Ceyhan limanına çatdırılması hər bir vətənpərvər azərbaycanlının qəlbində milli qürur və iftixar hissi doğurdu. Ulu öndərin adını daşıyan Bakı-Tbilisi-Ceyhan kəməri Azərbaycan nefti vasitəsilə üç dənizi birləşdirərək, əfsanəni həqiqətə çevirdi. Bu kəmərin təntənəli açılış mərasimi və Azərbaycan Respublikası Prezidentinin həmin mərasimdə söylədiyi dərin məzmunlu nitqi bu həqiqəti bütün dünyaya nümayiş etdirdi.
Beynəlxalq əhəmiyyətli Bakı-Tbilisi-Ərzurum qaz kəmərinin tikintisi də artıq başa çatdırılmışdır. Bu kəmər vasitəsilə artıq Gürcüstan ərazisinə qaz nəql edilir. Eyni zamanda, “Şahdəniz” yatağında gündəlik debiti 5 milyon kubmetrdən çox olan 2 nömrəli quyu istismara verilmişdir. “Şahdəniz” qazının Azərbaycan istehlakçılarına təhvili üçün diametri 750 millimetr olan 4500 metrlik qaz kəməri də vaxtında istismara verilmişdir.
Ötən il Dövlət Neft Şirkəti üzrə istehsalat-təsərrüfat fəaliyyətinin nəticələri də çox uğurlu olmuşdur. 2006-cı ildə Azərbaycanda 32 milyon tondan çox neft hasil edilmişdir. Beləliklə də, neft hasilatı üzrə 1941-ci ildə nail olunmuş ən yüksək rekord geridə qalmışdır. Hazırda Azərbaycanda gün ərzində orta hesabla 120 min ton neft hasil edilir ki, bu da gündəlik hasilat baxımından bizim tariximizdə rekord göstəricidir. Neftçilərimiz bu ilin birinci rübünü də uğurla başa vurmuş, dövlətə neft təhvili proqnozunu 100 faizdən artıq yerinə yetirmişlər.
Dövlət Neft Şirkəti tərəfindən 2 milyon 190 min ton, Azərbaycan Beynəlxalq Əməliyyat Şirkəti tərəfindən isə 8 milyon 230 min ton neft hasil edilmişdir. İlin sonuna qədər Azərbaycanda neft hasilatının 43 milyon tondan çox olacağı gözlənilir.
Cənab Prezident, Azərbaycan neftçiləri Sizin qarşıya qoyduğunuz tapşırıqları əzmlə yerinə yetirirlər. Birinci rübün nəticələrinə görə, 1 milyard 300 milyon kubmetr, ötən ilin müvafiq dövrü ilə müqayisədə 36 faiz çox qaz təhvil verilmişdir. Eyni zamanda, ölkənin elektrik stansiyalarına 730 min tondan artıq mazut verilmişdir ki, bu da ötən ilin eyni dövrü ilə müqayisədə 1,5 dəfə çoxdur.
Cənab Prezident, Sizin verdiyiniz göstərişə əsasən, Dövlət Neft Şirkəti üzrə 2008-ci ildə qaz təhvilinin 8 milyard kubmetrə çatdırılması üçün hazırlanmış kompleks tədbirlər proqramı uğurla davam etdirilir. Artıq həyata keçirilmiş bir sıra tədbirlər ötən ildə və bu ilin birinci rübündə müsbət nəticələr verməkdədir. Belə ki, “Günəşli” yatağında aparılmış layihə və tikinti-quraşdırma tədbirləri böyük xərclə yeni platforma tikmədən, mövcud platformalardan yeni quyular qazmağa imkan vermişdir. Cari ilin yanvar-mart aylarında ötən ilin müvafiq dövrü ilə müqayisədə 2 dəfə çox - 47 min 419 metr qazma işi görülmüşdür. Neft daşlarında tikilməkdə olan 1887 nömrəli özülün bir hissəsinin zəruri tamamlama işləri görülmüş və əvvəlcədən qazılmış 3 quyu istismara verilmişdir. İndi dördüncü quyu istifadəyə hazırlanır. Qazın yığılması və sahilə çatdırılması üçün ümumilikdə 56 kilometrdən artıq sualtı qaz xətləri çəkilmişdir. Bu və görülmüş əlavə geoloji-texniki tədbirlər nəticəsində şirkət orta gündəlik qaz hasilatını 6,4 milyon kubmetrdən 10,8 milyon kubmetrə çatdırmışdır.
Möhtərəm cənab Prezident, şirkətimiz dünya bazarında təkcə neft ixracçısı kimi deyil, həm də neft məhsullarının istehsalçısı və ixracçısı kimi tanınmaqdadır. Şirkətin emal müəssisələrində ötən il 7,4 milyon, bu ilin birinci rübündə isə 2 milyon tondan artıq neft emal edilmişdir. Ötən il daxili tələbat tam ödənilmiş, 3 milyon tona qədər neft məhsulu ixrac olunmuşdur. Neft və neft məhsullarının satışı da daxil olmaqla, yanvar-mart ayları ərzində şirkətin valyuta və hesablaşma hesablarına ümumilikdə 1 milyard 96 milyon manatdan çox vəsait daxil olmuşdur. Bu, ötən ilin müvafiq dövrünə nisbətən 90 milyon manat çoxdur. Daxil olan vəsaitin 143 milyon manatdan artığı kapital qoyuluşlarına sərf edilmişdir.
Zati-aliləri, Sizin dəfələrlə dediyiniz kimi, bugünkü səviyyə ilə kifayətlənmək olmaz. Neft Şirkətini dünya standartlarına cavab verən güclü, modern bir quruma çevirməyə nail olmalıyıq.
Şirkətin işinin təkmilləşdirilməsi üçün, Sizin Fərmanınızla daha çevik idarəetmə mexanizmi yaradılmışdır. Bu da verilən tapşırıqların vaxtında yerinə yetirilməsinə geniş imkanlar açmışdır. Dövlət Neft Şirkəti bu gün beynəlxalq səviyyədə səmərəli fəaliyyət göstərir. Ötən il biz Rumıniyada, Türkiyədə və Gürcüstanda şirkətin nümayəndəliklərini açdıq. İndi Ceyhanda və Avropa bazarında bazarlama aparmaq üçün daha əlverişli şərait yaranmışdır. Bildiyiniz kimi, Gürcüstanda və Türkiyədə nüfuzlu yerli şirkətlərlə birlikdə öz müəssisələrimizi də təsis etmişik. Sizin göstərişinizə əsasən, şirkətin emal sənayesinin Qara dəniz və Aralıq dənizi limanlarına yaxınlaşdırılması xətti götürülmüşdür. Bu məqsədlə Ceyhan limanında Dövlət Neft Şirkətinin emal zavodunu inşa etmək üçün ilkin sənədlər hazırlanıb Türkiyə hökumətinə təqdim olunmuşdur. Mən qürur hissi ilə demək istəyirəm ki, Qara dəniz sahillərində liman və neft terminalına malik olmaq kimi tarixi hadisə də cənab Prezident, Sizin rəhbərliyiniz altında gerçəkləşmişdir. Gürcüstanda alınmış “Kuleri” terminalı bu il istismara veriləcəkdir.
Möhtərəm cənab Prezident, Sizin daha bir göstərişinizə əsasən, biz şirkətimiz üçün yüksək səviyyəli kadrların hazırlanması məqsədi ilə ötən ildən xüsusi təqaüd proqramını həyata keçiririk. Artıq 5 tələbə şirkətimizin vəsaiti hesabına ABŞ və Birləşmiş Krallığın nüfuzlu universitetlərində təhsil alır. Hazırda 26 tələbənin yüksək reytinqli xarici təhsil müəssisələrində yerləşdirilməsi üçün işləri yekunlaşdırırıq.
Şirkətimiz ölkənin sosial problemlərinin həllində yaxından iştirak edir. Dövlət Neft Şirkəti Azərbaycan Prezidentinin təşəbbüsü və şəxsi nəzarəti ilə həyata keçirilən regionların sosial-iqtisadi inkişafı Dövlət proqramının icra olunmasına töhfəsini verir. Şirkətin maliyyə vəsaiti hesabına ölkənin ondan artıq regionunda ən müasir tələblərə cavab verən müalicə-diaqnostika mərkəzi inşa olunur. Ötən il Lənkəran şəhərində və Naxçıvanda bu tip mərkəzlər tikilərək, cənab Prezident, Sizin iştirakınız ilə istifadəyə verilmişdir. Həmin mərkəzlərin maddi-texniki bazasına cənab Prezidentin verdiyi yüksək qiymət bizi sosial proqramların həyata keçirilməsində daha da fəal olmağa ruhlandırır. Fürsətdən istifadə edərək, Sizi əmin etmək istəyirəm ki, bu ilin mart ayında özülünü qoyduğunuz Şamaxı diaqnostika mərkəzi və digər regionlarda tikdiyimiz analoji müalicə ocaqları qarşıdakı iki ildə yüksək səviyyədə təhvil veriləcəkdir.
2007-ci ildə Dövlət Neft Şirkəti üzrə neft hasilatını 8 milyon 800 min tona, qaz hasilatını isə 5 milyard 870 milyon kubmetrə çatdıracağıq ki, bu da 2006-cı ildəkindən 1 milyard 270 kubmetr çoxdur.
Cənab Prezident, Sizi bir daha əmin edirəm ki, neftçilər həmişə olduğu kimi, bundan sonra da dövlətimizin enerji təhlükəsizliyinin möhkəmləndirilməsi, xalqımızın maddi rifah halının daha da yaxşılaşdırılması naminə ulu öndərimiz Heydər Əliyevin şah əsəri olan inkişaf və tərəqqi strategiyasına sadiq qalacaqlar. Diqqətinizə görə çox sağ olun.
Bölmənin digər xəbərləri
