DÖVLƏT SOSİAL MÜDAFİƏ FONDUNUN İNTERNET SAYTI YARADILMIŞDIR
Fondun sədri Səlim Müslümov çıxış edərək bildirdi ki, saytın yaradılmasından məqsəd DSMF tərəfindən aparılan işlər barədə respublika əhalisini məlumatlandırmaqdır.
www.sspf.gov.az ünvanlı sayt aktual mövzuları əhatə edən bir neçə bölmədən ibarətdir. Burada Fondun strukturu və rəhbərliyi haqqında, onun fəaliyyətini əks etdirən məlumatlar, respublikada həyata keçirilən pensiya islahatı, əldə olunan nailiyyətlər, əlaqə telefonları və elektron poçtun ünvanı göstərilmişdir. Bütün bunlar Fondun fəaliyyətinin şəffaflığını təmin edən əsas amillərdəndir.
Saytda Azərbaycan Respublikasının inzibati xəritəsi də yerləşdirilmişdir. Burada respublikanın istənilən rayonu üzrə pensiyaçıların sayı, pensiyaların növləri barədə və digər məlumatlar əldə etmək mümkündür. Səhifədə həmçinin Fondun rəhbərliyinin və departament direktorlarının, habelə yerli filiallarda qəbul vaxtları barədə də məlumat almaq olar.
Bundan əlavə, İnternet səhifəsində sosial sığorta və pensiya təminatına aid olan dolğun qanunvericilik bazası yerləşdirilmişdir. Burada Azərbaycan Respublikasının qanunları, ölkə Prezidentinin, Nazirlər Kabinetinin fərman və sərəncamları haqqında geniş məlumat verilir.
Saytda elektron poçt fəaliyyət göstərir. Fondun mütəxəssisləri həmin poçt vasitəsilə vətəndaşları maraqlandıran suallara operativ cavab verəcəklər.
