DÜNYA BANKI “İNVESTİSİYA FƏALİYYƏTİ HAQQINDA” QANUN LAYİHƏSİ İLƏ MARAQLANIR
AZƏRTAC xəbər verir ki, fevralın 4-də Dünya Bankının Azərbaycan üzrə nümayəndəsi Əhməd Cahani Milli Məclisin iqtisadi siyasət daimi komissiyasının üzvləri ilə “İnvestisiya fəaliyyəti haqqında” qanun layihəsini geniş müzakirə etmişdir.
Komissiyanın sədri Səttar Səfərov demişdir ki, Azərbaycan hökuməti və parlamenti qanunların Avropa standartlarına uyğunlaşdırılması, eləcə də, iqtisadi qanunvericilik bazasının təkmilləşdirilməsi sahəsində Beynəlxalq Valyuta Fondu, Dünya Bankı və digər beynəlxalq maliyyə qurumları ilə sıx əməkdaşlıq edir. “İnvestisiya fəaliyyəti haqqında” qanun layihəsi ətrafında aparılan fikir mübadiləsi buna əyani sübutdur. Sonra o, layihə ilə bağlı ətraflı məlumat vermişdir.
Layihə ətrafında geniş fikir mübadiləsi aparılmışdır.
Əhməd Cahani yeni qanun layihəsinin hazırlanmasını yüksək qiymətləndirmişdir. O, layihədə xarici sərmayədarlara yerli iş adamları ilə eyni şəraitin yaradılmasının, sərmayədarlara yerli və beynəlxalq məhkəmələrə müraciət etmək hüququnun, kompensasiya ödənilməsi mexanizminin və digər vacib məqamların daha aydın göstərilməsi vacibliyini nəzərə çarpdırmışdır.
Bölmənin digər xəbərləri
