DÜNYA BANKININ NÖVBƏTİ MİSSİYASI AZƏRBAYCANA GƏLƏCƏK
Dünya Bankının nümayəndə heyəti Azərbaycanın qaz sektorunun strategiyasını işləyib hazırlamaq və ölkədə yoxsulluğun səviyyəsini müəyyənləşdirmək üçün yanvarın 13-də Bakıya gələcəkdir. Nümayəndə heyətinə özəl sektorun inkişafı üzrə aparıcı mütəxəssis Alan Taunsen, neft-qaz sektoru üzrə ekspert Uilyam Porter və bankın aparıcı iqtisadçısı Maykl Millz daxildirlər.
Dünya Bankının Bakıdakı ofisindən AZƏRTAC-ın müxbirinə bildirmişlər ki, qaz sektoru strategiyasının işlənib hazırlanması SAC-2 /”Struktur dəyişikliklərinin kreditləşdirilməsi”/ layihəsi çərçivəsində həyata keçirilir. Bundan əlavə, Dünya Bankının rəhbərliyi “Azəriqaz” səhmdar cəmiyyətinin qənaət etdiyi vəsait hesabına “Qaz sisteminin yenidən qurulması” layihəsi çərçivəsində işin davam etdirilməsi barədə Azərbaycan hökumətinin təklifini nəzərdən keçirir. Burada istifadə olunmamış 6 milyon dollara müasir avadanlıq alınmasından söhbət gedir.
Cənab Maykl Millzin əsas vəzifəsi isə 1997-ci ildə hazırlanmış sənəd və hazırkı statistik göstəricilər əsasında yoxsulluğun səviyyəsinin azalması haqqında məlumatları tutuşdurmaqdan ibarət olacaqdır.
Bölmənin digər xəbərləri
