DÜNYA LİDERLƏRİNİN FORUMUNDA CƏNUBİ QAFQAZDAKI VƏZİYYƏT MÜZAKİRƏ OLUNMUŞDUR
AZƏRTAC xəbər verir ki, ABŞ-da Milli Demokrat Partiyasının qurultayı və Dünya Liderlərinin Forumu keçirilmişdir.
Dörd gün davam edən tədbirlər avqustun 28-də başa çatmışdır.
Tədbirlərdə Azərbaycanı Prezidentin İcra Aparatının ictimai-siyasi məsələlər şöbəsinin müdiri Əli Həsənov təmsil etmişdir.
Ə.Həsənov demişdir ki, qurultayda əsasən Milli Demokrat Partiyasının ABŞ-da keçiriləcək prezident seçkilərində iştirakı, partiyanın namizədinin təsdiqi məsələsinə baxılmışdır. İki gün davam edən müzakirələrdə partiyanın fəaliyyəti, müasir Amerikanın həyatındakı rolu, prezidentliyə namizəd Barak Obamanın ABŞ-ın gələcək inkişafında, onun idarəçiliyində iştirakı və digər məsələlərə dair fikir mübadiləsi aparılmışdır.
Son iki gündə isə bu partiyanın fəallarının da iştirakı ilə Dünya Liderləri Forumu keçirilmişdir. Forumda müasir dünya siyasəti, onun əsas meyilləri, dünyada, o cümlədən Cənubi Qafqazda cərəyan edən hadisələr, bu proseslərdə beynəlxalq hüququn tətbiqi, reallıqlar, perspektivlər və proqnozlar müzakirə olunmuşdur.
Forumda dünyanın müxtəlif ölkələrindən gəlmiş siyasi partiyaların, rəsmi və qeyri-rəsmi qurumların nümayəndələri iştirak etmiş, rəy və təkliflərini bildirmiş, fikirlərini bölüşmüşlər.
Bölmənin digər xəbərləri
