DÜŞƏNBƏDƏ ŞANXAY ƏMƏKDAŞLIQ TƏŞKİLATININ ÜZVÜ OLAN ÖLKƏLƏRİN BAŞÇILARININ ZİRVƏ GÖRÜŞÜ KEÇİRİLMİŞDİR
AZƏRTAC-ın xüsusi müxbiri xəbər verir ki, avqustun 28-də Düşənbədə Şanxay Əməkdaşlıq Təşkilatının üzvü olan ölkələrin başçılarının Zirvə görüşü keçirilmişdir.
Görüşdə təşkilatın üzvü olan ölkələr - Rusiya, Çin, Özbəkistan, Qazaxıstan, Qırğızıstan və Tacikistanın dövlət başçıları Dmitri Medvedev, Hu Szintao, İslam Kərimov, Nursultan Nazarbayev, Kurmanbek Bakiyev və Emoməli Rəhmon iştirak etmişlər.
Təşkilatda müşahidəçi statusu olan ölkələrin - İranın Prezidenti Mahmud Əhmədinejad, Monqolustan, Hindistan və Pakistanın səlahiyyətli nümayəndə heyətləri, qonaq qismində Əfqanıstan və Türkmənistanın dövlət başçıları Həmid Kərzai və Qurbanqulu Berdiməhəmmədov da Zirvə görüşünə qatılmışdır.
Görüşdə beynəlxalq terrorizmlə mübarizədə səylərin əlaqələndirilməsi, regional təhlükəsizlik və sabitliyin təmin edilməsi, Cənubi Qafqazda vəziyyət, region ölkələrinin iqtisadi münasibətlərinin gücləndirilməsi və digər məsələlər müzakirə edilmişdir.
İran Prezidenti təşkilatın birgə valyutasının və Bankının yaranmasını, dövlətlərarası ödəmələrin məhz bu valyuta ilə həyata keçirilməsini təklif etmişdir.
Tədbir çərçivəsində dövlət başçıları bir sıra ikitərəfli görüşlər keçirmişlər.
Görüşün yekunlarına dair Düşənbə bəyannaməsi imzalanmışdır.
Bölmənin digər xəbərləri
