Əbdürrəhim bəy Haqverdiyev ədəbiyyat xəzinəmizin zənginləşməsində böyük xidmətlər göstərib
Naxçıvan, 15 may, AZƏRTAC
Görkəmli yazıçı Əbdürrəhim bəy Haqverdiyev orijinal, özünəməxsus üslubu ilə realist nəsrdə bir sıra əsərlər qələmə alıb. O, yaradıcılığı dövründə pyes, hekayə, məqalə və xatirə yazıb, rus və dünya ədəbiyyatından tərcümələr edib, eyni zamanda, səhnəmiz üçün dram əsərləri ərsəyə gətirib.
AMEA Naxçıvan Bölməsindən AZƏRTAC-ın Naxçıvan bürosuna bildirilib ki, bu barədə AMEA Naxçıvan Bölməsində Azərbaycan ədəbiyyatının görkəmli nümayəndəsi Əbdürrəhim bəy Haqverdiyevin anadan olmasının 150 illiyinə həsr olunan onlayn elmi konfransda ətraflı danışılıb.
Tədbirdə çıxış edən bölmənin sədri, akademik İsmayıl Hacıyev Prezident İlham Əliyevin “Əbdürrəhim bəy Haqverdiyevin 150 illik yubileyinin qeyd edilməsi haqqında” 2020-ci il 31 yanvar tarixli Sərəncamının əhəmiyyətindən bəhs edib. O, görkəmli yazıçının həyat və fəaliyyətinə nəzər salaraq bildirib ki, Əbdürrəhim bəy Haqverdiyev həm bədii yaradıcılığı, elmi-nəzəri məqalələri, həm də tərcümə əsərləri ilə ədəbiyyat xəzinəmizin zənginləşməsində böyük xidmətlər göstərib.
Akademik bildirib ki, Əbdürrəhim bəy Haqverdiyevin adının UNESCO-nun 2020-2021-ci illər üçün görkəmli şəxslərin və əlamətdar hadisələrin yubileyləri siyahısına daxil edilməsi onun yaradıcılığına verilən dəyərdir.
Onlayn konfransda yazıçının ədəbi-bədii yaradıcılığı ilə yanaşı, onun mədəni-ictimai fəaliyyətindən, milli ideologiyanın oyanışında misilsiz xidmətlərindən də söz açılıb. Qeyd olunub ki, ədibin zəngin yaradıcılıq fəaliyyəti bundan sonra da öyrəniləcək.
Bölmənin İncəsənət, Dil və Ədəbiyyat İnstitutunun direktoru, AMEA-nın müxbir üzvü Əbülfəz Quliyev “Əbdürrəhim bəy Haqverdiyevin həyatı və yaradıcılıq yolu”, institutun elmi işlər üzrə direktor müavini, professor Hüseyn Həşimli “Əbdürrəhim bəy Haqverdiyevin dramaturgiyası”, Ədəbiyyatşünaslıq şöbəsinin müdiri, filologiya üzrə fəlsəfə doktoru, dosent Ramiz Qasımov “Bədii nəsrimizin tarixində Əbdürrəhim bəy Haqverdiyevin mövqeyi”, Musiqi və teatr şöbəsinin böyük elmi işçisi, sənətşünaslıq üzrə fəlsəfə doktoru, dosent Ələkbər Qasımov “Əbdürrəhim bəy Haqverdiyevin pyesləri Naxçıvan səhnəsində” və Dilçilik şöbəsinin müdiri, filologiya üzrə fəlsəfə doktoru, dosent Nuray Əliyeva “Əbdürrəhim bəy Haqverdiyev əsərlərinin bədii dil və üslub xüsusiyyətləri” mövzularında məruzə ilə çıxış ediblər.
Bölmənin digər xəbərləri
