Ədəbiyyat Muzeyinin əməkdaşları “Web of Science” barədə məlumatlandırılıb
Bakı, 24 dekabr, AZƏRTAC
“Clarivate Analytics” (“Thomson Reuters”) agentliyi tərəfindən Azərbaycan Milli Elmlər Akademiyasının (AMEA) Nizami Gəncəvi adına Milli Azərbaycan Ədəbiyyatı Muzeyinin əməkdaşları üçün “Web of Science” məlumat platformasından istifadəyə dair maarifləndirici seminar təşkil olunub.
AMEA-dan AZƏRTAC-a bildiriblər ki, tədbirdə agentliyin Azərbaycan üzrə nümayəndəsi və elmi-informasiya resursları üzrə eksperti Aygün Babazadə platformanın imkanları və əsas elementləri, beynəlxalq elmi jurnalların seçilməsi və məqalələrin dərc edilməsi, elmi istinadlar və onların analizi, humanitar elmlər üzrə axtarış sorğusunun tərtib edilməsi barədə məlumat verib.
Seminarda muzeyin elmi işlər üzrə direktor müavini, professor Xatirə Bəşirli, şöbə müdirləri professor Aida Qasımova, filologiya üzrə fəlsəfə doktoru Nəzmiyyə Yigitoğlu, kulturologiya üzrə fəlsəfə doktoru Nailə Əliyeva və başqaları çıxış edərək təkliflərini bildiriblər.
Daha sonra akademik yazı üslubunun başlıca tələbləri və digər mövzular ətrafında geniş müzakirələr aparılıb.
Bölmənin digər xəbərləri
